3656 áskerı bóliminiń komandıri polkovnık Dmıtrıı Basterdiń bastamasymen Astana garnızonynyń áskerı qyzmetshileriniń balalary úshin Halyqaralyq balalardy qorǵaý kúnine arnalǵan mereke uıymdastyryldy. Is - sharaǵa Ishki ister mınıstriniń orynbasary — Ulttyq ulannyń Bas qolbasshysy general-leıtenant Erkin Botaqanov, Ulttyq ulan Bas qolbasshysynyń tárbıe jáne áleýmettik-quqyqtyq jumystar jónindegi orynbasary general-maıor Qaırat Úmbetov, Qazaqstan Respýblıkasy Ulttyq ulany Bas qolbasshylyǵynyń, sondaı-aq elordalyq brıgadanyń áskerı qyzmetshileri men olardyń otbasy músheleri qatysty.
Avıasııalyq bazada áskerı qyzmetshilerdiń balalary úshin ertegi keıipkerleriniń qoıylymdary, túrli oıyndar, konserttik baǵdarlama, sporttyq jarystar men fleshmob daıyndaldy. Al eń kishkentaı qonaqtar úshin ulandyqtar arnaıy qaýipsiz alań ázirledi, onda balalar asfaltqa bormen sýretter saldy. Sondaı-aq, mereke ıelerine jarystarǵa belsendi qatysqany jáne saıystaǵy jeńisteri úshin syılyqtar men gramotalar tabystaldy.
«Búgin biz eń jarqyn jáne qýanyshty merekelerdiń biri — Balalardy qorǵaý kúnin atap ótýdemiz. Bul kún balalardyń bolashaǵymyz úshin qanshalyqty mańyzdy ekenin, úmit pen armandarymyzdyń olarǵa tikeleı baılanysty ekenin eske salady. Balalarǵa qamqorlyq jasaý - bizdiń eń úlken qundylyǵymyz. Balalar - elimizdiń bolashaǵy. Árqaısysy ózinshe talantty. Olardyń árbirin maqtan tutamyz!», dedi Ulttyq ulannyń Bas qolbasshysy general-leıtenant Erkin Botaqanov.
Ofıserler men serjanttar barlyq nazaryn balalarǵa arnady. Mereke kúni quqyqtyq tártip áskeriniń áýe bazasy balalar ánderine, kóńildi mýzykaǵa, bı men tátti kúlkige toly boldy. Tamasha kóńil-kúı men muqııat oılastyrylǵan merekelik baǵdarlama jazdyń bastalýyn atap ótken balalar merekesine sán berdi.
«Mundaı is-sharalar óte mańyzdy. Sebebi, mundaı sátter mindetti túrde balalardyń esterinde saqtalady jáne olar óskende osy merekeniń mańyzyna mán berýge, kelesi urpaqqa qamqorlyq tanytýǵa tyrysady. Ofıser men komandır qyzmette qanshalyqty qatal bolsa da, úıde balanyń kúlimsireýinen eljirep, júregi súıispenshilikke tolatyn meıirimdi áke. Balalar ata-analarynyń osy merekeni ózderimen birge oınap, bılep, bóliskenine dán rıza», dedi general-maıor Qaırat Úmbetov.
QR Ulttyq ulanynyń Án-bı ansambli jınalǵan kópshilikti konserttik baǵdarlamamen qýantty.
Is-shara sońynda balalarǵa balmuzdaq pen túrli dámdi taǵamdar taratyldy.
