Foto: inbusiness.kz
inbusiness.kz saıtynyń jazýynsha áleýmettiń ózekti problemasyna aınalǵan ýtılızasııalyq alym salyǵyna narazy azamattar arnaıy petısııa jarııalap, jýyrda salyqqa qarsylar sany 50 myń adamnan asty. Zań boıynsha qarsy qol qoıýshylar sany belgili bir mejege jetkende, mindetti túrde qaıta qaralatyn bul prosess týraly Senat minberinen de aıtyldy.
Parlament otyrysynda Senat tóraǵasy Máýlen Áshimbaev ýtılızasııalyq salyqtan jınalǵan qarajat jóninde aqparattyń jetispeýshiligin synǵa alǵan edi.
«Halyq ózderinen jınalatyn qarajattyń qaıda jáne qalaı jumsalatynyn bilgisi keledi. Jınalǵan qarajatty kompanııalar qandaı maqsatta paıdalanyp jatqanyn bilýge tıis, ashyqtyq pen jarııalylyq kerek, barlyq másele osydan týyndap otyr. Bolashaqta jaýapty memlekettik qurylymdar men bul qarajatty jumsap jatqan kompanııalar tolyq ashyqtyqty qamtamasyz etedi dep senemiz», dedi Senat tóraǵasy.
Halyqtyń suraýy men bıliktiń synyna jedel jaýap qatqan О́nerkásip jáne qurylys mınıstri Qanat Sharlapaevtyń ýáji qoǵamdy qanaǵattandyrmady.
«Ýtılalymnan túsken qarajattan avtomobılge arnalǵan dóńgelekter men shınalar, plastıkalyq avtobólshekter shyǵarylady. Kásiporyndardyń múddesin qorǵaý – meniń tikeleı mindetim. Lobbızm jasady deý orynsyz. Otandyq ónerkásiptiń damýyna jaǵdaı jasaýymyz kerek», degen edi mınıstr.
Alaıda Qazaqstanda jasalǵan avtodóńgelekter men plastıkalyq avtobólshekterdi elimizdiń bazarlary men avtodúkenderinen kezdestirý neǵaıbyl. Bazarlar men dúkenderden sapasy nashar qytaı ónimderi alynyp tastalýy kerek edi ǵoı?!
Sonymen, 24 mamyr men 5 shilde aralyǵyn qamtıtyn ýtıl alym taǵdyryn sheshetin proses kezinde arnaıy jumys toby qurylady. Onyń quramyna memlekettik tıisti organdardyń músheleri, qoǵamdyq yntaly top ókilderi kirgiziledi. Jumys toby óńirlerge shyǵyp, halyqpen keńes ótkizýdi josparlap otyr. Qajet bolsa zaýyttar men kásiporyndarda bolyp, ýtıl alymnan túsken qarajattyń jumsalyp jatqan jerin de kórsetpek. Komıssııa jumysy qorytyndylanǵan kezde mınıstrlik qoǵamdyq talqylaý ótkizedi.
