Árıne, respýblıka boıynsha Abaı atyndaǵy bilim jáne mádenıet mekemeleri jetkilikti. Biraq arǵy tarıhy 1918 jyly Tashkentten bastalatyn, 1928 jyly sol kezdegi astana Almatyda qaıta jańǵyrǵan ultymyzdyń tuńǵysh joǵary oqý ornyna 1935 jyly alǵash Abaı esimi berilgen edi. Qazirgi tańda el ustazdarynyń ustahanasyna aınalǵan Abaı atyndaǵy Qazaq ulttyq pedagogıkalyq ýnıversıtetiniń osy mindetterdi júıeli túrde júzege asyrýda ınnovasııalyq jumys formalaryn izdestirip, sony ıdeıalardyń bastamashysy bolýy zańdylyq bolsa kerek. Sondyqtan Abaı ýnıversıteti Semeı qalasyndaǵy Abaıdyń «Jıdebaı-Bórili» memlekettik tarıhı-mádenı jáne ádebı-memorıaldyq mýzeımen baılanysty kúsheıtý jumystaryn qolǵa aldy. Osy rette atalǵan mýzeıdiń 1940 jyly hakim Abaıdyń qarashańyraǵynda negizi qalanǵan Qazaqstan tarıhyndaǵy tuńǵysh ádebı-memorıaldyq mýzeı ekenine erekshe toqtalyp ótkenimiz abzal.
Jas urpaqty tárbıeleý, bilikti kadrlar daıarlaý isinde zamanaýı mýzeılerdiń múmkindikterin ońtaıly qoldaný, bilim ordalary men mýzeı syndy mádenıet mekemeleriniń áleýetin biriktirý baǵytyndaǵy usynystarymyzdyń Mádenıet jáne aqparat mınıstri Aıda Balaevanyń tarapynan úlken qoldaý tapqany osy ortaq mindetterdi sheshý jolynda ýnıversıtetimizdiń ustaz ǵalymdarynyń kúsh-jigerin biriktirýge jetelep otyr. Abaı ýnıversıtetiniń tikeleı bastamasymen Semeıde ótken «Abaı murasy jáne zamanaýı mýzeı: tanym, bilim-ǵylym jáne tárbıe toǵysy» taqyrybyndaǵy dóńgelek ústelge atalǵan mınıstrlik ókilderiniń keńesshileri Sherhan Talap pen Erbol Alshynbaıdyń arnaıy qatysyp, aldaǵy mindetter týraly tushymdy pikirler men shynaıy usynystar aıtýy osyndaı qoldaýdyń shynaıy kórinisi bolsa kerek.
Dóńgelek ústelde Abaı murasyn jastar arasynda nasıhattaýda jańasha jumys formalaryn aıqyndaý, jahandaný jaǵdaıynda zamanaýı mýzeıdiń múmkindikterin jas urpaqtyń bilim-ǵylym, tárbıe-tanym úderisinde tıimdi qoldanýdyń joldaryn izdestirý, mýzeıge kelýshiler sanyn arttyrý úshin jańa ádistemelik tetikterdi qalyptastyrýǵa yqpal etý, ólketaný baǵyttaǵy mádenı týrızmdi damytý, Abaı mýzeıi men Abaı ýnıversıtetiniń yntymaqtastyq baılanys aıasyn keńeıtý máseleleri keńinen talqylandy.
Abaı ýnıversıteti bolashaqta Abaıdyń «Jıdebaı-Bórili» memlekettik tarıhı-mádenı jáne ádebı-memorıaldyq mýzeı-úıinde arnaıy ǵylymı-ádistemelik kabınet ashýdy josparlap otyr. Bul týraly Abaı ýnıversıteti fılologııa fakýltetiniń dekany, fılologııa ǵylymdarynyń doktory A.Tańjaryqova óz sózinde tolyq baıandap ótip, mýzeı jumysyn jetildirý boıynsha usynylatyn «Mektep oqýshylaryna arnalǵan tanymdyq baǵdarlamalar» jobasyna toqtaldy.
Dóńgelek ústel barysynda «Abaıdyń «Jıdebaı-Bórili» memlekettik tarıhı-mádenı jáne ádebı-memorıaldyq mýzeı-qoryǵy» RMQK dırektory Ulan Saǵadıev sóz sóılep, mýzeı jumysynyń basty baǵyttaryn atap ótti. Al Abaı atyndaǵy QazUPÝ «Hakim Abaı» ortalyǵynyń dırektory, fılologııa ǵylymdarynyń kandıdaty Jabal Shoıynbet «Abaıdyń «Tolyq adam» ilimi – búgingi rýhanı qajettilik» taqyrybynda, Shákárim atyndaǵy ýnıversıtettiń professory, fılologııa ǵylymdarynyń doktory Arap Espenbetov «Abaı ıdeıalarynyń ózegi men máni» taqyrybynda mazmundy baıandamalar jasady.
Talqylaýda Abaı oblysy ardagerler keńesiniń tóraǵay Murat Alın, Abaı atyndaǵy QazUPÝ professory, fılologııa ǵylymdarynyń doktory Baltabaı Ábdiǵazıuly, Semeı qalasyndaǵy T.Amanov atyndaǵy jalpy orta bilim beretin mekteptiń pedagog-sheberi, «Abaıtaný» oqýlyǵynyń avtory Gúlnar Qýnafına, Abaı atyndaǵy QazUPÝ dosenti, fılologııa ǵylymdarynyń kandıdaty Marat Bekbosynov jáne taǵy basqa zııaly qaýym ókilderi sóz sóıledi.
Dóńgelek ústelde Abaı atyndaǵy QazUPÝ «Hakim Abaı» ortalyǵynyń dırektory, fılologııa ǵylymdarynyń kandıdaty Jabal Alshynbekulynyń kitabynyń tusaýkeser rásimi ótti.
Is-shara sońynda eki mekemeniń birlesken jumys jospary talqylanyp, Abaı ýnıversıteti men Abaı mýzeı arasyndaǵy yntymaqtastyq memorandýmyna qol qoıyldy.
Atalǵan is-shara, shyn máninde, Abaı ýnıversıteti men Abaı mýzeıi arasyndaǵy yntymaqtastyqty jandandyrý men damytýdyń basym baǵyttaryn aıqyndap otyryp, el múddesi, ult bolashaǵy, qoǵamnyń rýhanı-mádenı damýy jolynda Abaı muralaryn dáripteýdiń qanshalyqty mańyzdy ekendigin taǵy bir dáleldep berdi.
Rıma ÁBDIQADIRQYZY,
Abaı atyndaǵy QazUPÝ baspasóz qyzmetiniń jetekshisi
