– Bas ǵımarat aldyndaǵy kópirmen kóterilip kele jatyrmyn. Qarsy aldymnan Aqań shyqty. Ýaı, meniń Aqseleý aǵam keń edi ǵoı, shirkin. Janyna únemi jaqyn tartyp júredi. Onysyn men de jaqsy bilemin. Sóıtip, kópirdiń qarsy betinde naıqalǵan nardaı bolyp kele jatqan aǵataıyma ádettegi erkelik erkindigimmen aıqaı saldym. «Aqa, qolyńyzdy kóterińiz!». Ol á degende abdyrap qaldy da, buıryq berýshiniń men ekenin kórip kúlip jiberdi. «Al, kóterdim qolymdy!» dedi baıypty daýsymen. Som tulǵaly aǵataıym osy sátte kishkene bala sekildi kóńildenip, pármenimdi eki etpeı oryndady. Men odan saıyn órshelene túsemin. «Turǵan jerińde tur, qozǵalýshy bolma!». Aqseleý aǵa da baısaldy qalpyn buzbaı qazdıyp tur. Eresek kisilerdiń balasha áreketi qyzyq bolyp kóringen shyǵar, eldiń bári «Endi qaıter eken?» dep bizge qarap tur. Osy sátti kútip turǵan men qasyna jetip bardym da, aǵamdy qushaqtaı aldym. Aqań máz-meıram!
– Aǵa, – deımin erkelep. – Sizdiń ústińizden jýsannyń jupary burqyrap turady. Sony ıiskeıinshi dep keldim.
– Aınalaıyn-aı! – dep Aqseleý aǵam baýyryna odan saıyn qysa berdi. Osy bir syılastyq, tatýlyq, aǵa men ini arasyndaǵy qurmet Qudaıdyń bergen eń baǵaly syıy dep bilemin. Al qazir arqamnan qaǵyp, aqylyn aıtatyn aǵalarym qaldy ma?
Tursyn aǵa tereń bir kúrsinip, oıǵa batty...
