Foto: Senat
Aýyl sharýashylyǵy mınıstriniń orynbasary Azat Sultanov kóktemgi egis jumystaryn júrgizý jónindegi sharalar erekshe baqylaýda ekeni týraly depýtattarǵa aıtyp berdi. Oblys ákimdikteriniń derekteri boıynsha bıylǵy jylǵy jalpy egis alqaby 23,8 mln gektardy quraıdy. Memleket basshysynyń aýyl sharýashylyǵy daqyldaryn ártaraptandyrý jónindegi tapsyrmasyna sáıkes, bıdaıdyń egis alqaby ótken jylmen salystyrǵanda 426 myń gektarǵa qysqaryp, 13,3 mln gektardy qurady. Sonymen qatar maıly daqyldar alqabyn 373 myń gektarǵa jáne jemshóp daqyldaryn 66 myń gektarǵa ulǵaıtý josparlanyp otyr.
Saýda jáne ıntegrasııa mınıstriniń orynbasary Qaırat Balyqbaev óz kezeginde parlamentshilerge agroónerkásip kesheni óniminiń taýar aınalymy salasyndaǵy 2023 jylǵy jaǵdaı týraly baıandady. Onyń aıtýynsha, 2023 jyly Qazaqstanǵa AО́K óniminiń ımporty 0,9%-ǵa tómendep, 5,9 mlrd AQSh dollaryn qurady. Eksport 4,3%-ǵa tómendep, 5,4 mlrd boldy.
Qatysýshylar shara barysynda osy sektordaǵy jaǵdaıdy jaqsartý boıynsha pikir almasty jáne aldaǵy is-qımyldar úshin basym baǵyttardy belgiledi. Atap aıtqanda, óndiristiń tıimdiligin arttyrý jáne aýyl sharýashylyǵy ónimderiniń eksportyn yntalandyrý sharalary aıqyndaldy.
