Komıtet tóraǵasy Andreı Lýkın Qazaqstan EYDU-daǵy halyqaralyq bastamalarǵa belsendi qatysyp kele jatqanyn aıta kelip, jahandyq kún tártibiniń damýyna úlesin qosqanyn atap ótti. Elimiz ózara is-qımyl jyldarynda Uıymnyń azamattar ómiriniń sapasyn jaqsartýǵa jáne ekonomıkalyq órkendeýge baǵyttalǵan joǵary standarttaryn dáıekti túrde engizýge jol ashty.
«Biz Qazaqstanda bolyp jatqan jańarý úderisterinde EYDU-nyń járdemin joǵary baǵalaımyz. Elimiz áleýmettik-ekonomıkalyq damýda jáne quqyqtyq, demokratııalyq memleket qurýda aıtarlyqtaı jetistikterge qol jetkizdi. Qazaqstan qazirgi kezeńde óziniń saıası jáne ekonomıkalyq damýynyń mańyzdy kezeńinde tur. 2022 jyldyń naýryz aıynda Memleket basshysy Ádiletti Qazaqstandy qalyptastyrý jónindegi saıası jáne ekonomıkalyq reformalar baǵdarlamasyna bastamashy boldy. Bul reformalar bılik tarmaqtary arasyndaǵy tejeý men tepe-teńdik júıesin nyǵaıtýǵa, memlekettik basqarýdyń ara-jigin ajyratýǵa, kóppartııalyq júıeni damytýǵa jáne saıası básekelestikti kúsheıtýge baǵyttalǵan. Prezıdenttiń baǵdarlamasy Qazaqstanda saıası demokratııalyq júıeni ornatý jolyndaǵy zor qadam boldy», dedi Andreı Lýkın.
Rolf Shvars uıym keıingi jyldary Qazaqstanda eleýli oń ózgeristerdi kórip otyrǵanyn atap ótti. Ol EYDU standarttaryn engizý jáne Qazaqstannyń halyqaralyq bastamalarǵa belsendi qatysýy ekonomıkanyń ósýine ǵana emes, azamattardyń ómir súrý jaǵdaıyn jaqsartýǵa da yqpal etkenin jetkizdi. Sondaı-aq eldegi saıası jáne ekonomıkalyq reformalardyń jalǵasýy demokratııanyń nyǵaıýyna jáne turaqty damýdy qamtamasyz etýge ákeletinine senim bildirdi.
Taraptar kezdesý sońynda ekonomıkalyq turaqtylyq pen halyqtyń áleýmettik ál-aýqatyn kúsheıtýge baǵyttalǵan EYDU baǵdarlamalary aıasynda odan ári yntymaqtastyq pen tájirıbe almasý múmkindikterin talqylady.
