Qarjy • 06 Maýsym, 2024

Valıýtalyq ıntervensııa jasalmady

97 ret

kórsetildi

1 mın

oqý úshin

Mamyr aıynyń qorytyndysy boıynsha teńge baǵamy 1,2%-ǵa – 1 dollar úshin 447,25 teńgege deıin álsiredi. Qazaqstan qor bırjasyndaǵy saýda-sattyqtyń ortasha kúndik kólemi bir aıda 234 mln dollardan 251 mln dollarǵa deıin ulǵaıdy. Saýda-sattyqtyń jalpy kólemi – 5 mlrd dollar. Ulttyq qordan respýblıkalyq bıýdjetke transfertterdi qamtamasyz etý úshin mamyrda 800 mln dollarǵa valıýta satylǵan.

Abaı AIMAǴAMBET

Foto: Inbusiness.kz

Ulttyq bank (UB) aqparatyna qarasaq, Ulttyq qordan satý úlesi jalpy saýda-sattyq kóleminiń 16%-y jáne kúnine 40 mln dollardan aspaıtyn mólsherde boldy.

«Ulttyq bank Ulttyq qordyń qarajatymen operasııa júrgizý kezinde naryqtaǵy beıtarap qaǵıdatyn saqtaıdy. Bul shetel valıýtasyn birkelki qalypta satýdy bildiredi», delingen málimdemede.

UB ótken aıda BJZQ zeınetaqy aktıvteriniń valıýtalyq úlesin 30% deńgeıinde ustap turý maqsatynda bırjalyq saýda-sattyqta shetel valıýtasyn satyp alýdy jalǵastyrǵan. Onyń jalpy somasy 500 mln dollar nemese naryqtyń jalpy kóleminiń shamamen 10%-yn qurady.

Sonymen birge UB mamyrda valıýtalyq ıntervensııalar júrgizgen joq.

Respýblıkalyq bıýdjetke transfert bólýge Úkimettiń aldyn ala boljamdy ótinimderi boıynsha 2024 jylǵy maýsymda UB Ulttyq qordan 350 mln dollardan 450 mln dollarǵa deıingi mólsherde valıýta satylýyn kútedi.

Bas banktiń baǵamdaýynsha, qysqamerzimdi perspektıvada teńge dınamıkasy naryqqa qatysýshylardyń kútýlerine, toqsandyq salyq tólemderine, álemdik naryqtardaǵy ahýalǵa jáne geosaıası jaǵdaıdyń ózgerýine baılanysty qalyptasady.