Kollajdy jasaǵan – Záýresh SMAǴUL ,«EQ»
О́ńir jurtshylyǵyn ábigerge salǵan tasqyn sý sábılerdiń esimine áser etkeni baıqalady. Azamattyq hal aktilerdi tirkeý basqarmasynyń basshysy Almagúl Tóremuratovanyń aıtýynsha, Atyraý qalasynda turatyn bir otbasy dúnıege kelgen tuńǵysh ulyn Tasqyn-bı esimimen ataýdy jón kórip otyr. Al Inder aýdanyndaǵy sábıdiń birine Tasqynbek esimi qoıylǵan. Bul – otbasyndaǵy segizinshi bala.
Bir qyzyǵy, eki ul da bir kúnde ómirge kelgen. Nárestelerdiń týǵan kúni – 29 sáýir.
Statıstıkalyq málimetke qaraǵanda, keıingi kezde Atyraý qalasynda ata-analar ulyna Muhammad esimin kóp tańdaıtyny baıqalyp otyr. Jyl basynan beri 32 sábıge dál osy esim qoıylǵan. Al 19 balaǵa Hamza, 15 ulǵa Aısultan esimimen týý týraly kýálik berilipti. Qyzdardyń arasynda tanymaldylyǵy turǵysynan Aısha esimi aldyńǵy orynda tur. Osy esim 33 burymdyǵa qoıylǵan. Budan soń 31 Medına, 29 Asylym, 27 Safııa esimi tirkelgen.
Al Jylyoı aýdandyq ortalyq aýrýhanasynyń dırektory Asýlan Abdrahmanovtyń deregine qaraǵanda, 5 sáýirden mamyrǵa deıin júkti analar 42 sábıdi dúnıege ákelgen. Onyń 20-sy ul, 22-si qyz. Qulsaryny tasqyn basqan kezde ińgálaǵan egiz ul – jas otbasynyń tórtinshi jáne besinshi balasy. Sábılerdiń boıy – 52 sm. Ekeýiniń salmaǵy birdeı emes. Bireýiniń salmaǵy – 3500, ekinshisi – 3350 gramm.
О́mirge sábı ákelgen ananyń biri – Qulsary qalasynyń turǵyny Juldyz Jandosqyzy 6 sáýirge qaraǵan túnde bosanǵan. Biraq birneshe saǵattan keıin Mańǵystaý oblysynyń Beıneý aýdanyndaǵy aýrýhanaǵa evakýasııalanǵan.
«Tún ortasynda ulymdy bosanǵan kezde Qulsary qalasyna tasqyn sý kirip, jurt ábigerge túsip jatqan edi. Bul – tuńǵysh sábıim. Sodan bolar, ulym úshin alańdadym», deıdi Juldyz Jandosqyzy. Jas ananyń aıtýynsha, ata-enesi nemeresine Bekzat esimin bergen. Alaıda sábıdiń búrkenshik esimi de bar.
«Biz ony Tasqynbaı dep erkeletemiz. О́ıtkeni ol sý tasqyny kezinde ómirge keldi. Týystarymyz da osylaı ázildegendi unatady», deıdi Juldyz Jandosqyzy.
Atyraý oblysy
