- Reseı sýperkýboginde «Baltıkanyń» qaqpasyna jeńis dobyn soqqan Nuráli Álipti jankúıerler osy matchtyń eń úzdik oıynshysy dep tanydy.
- «Eýro-2025» dodasynyń irikteý saıysynda S tobyndaǵy elimizdiń áıelder quramasy Armenııany 4:1 esebimen oısyrata utty. Bul goldardyń avtorlary – Aleksandra Býrova, Aıda Gaıstenova, Bıbigúl Nurysheva jáne Áselhan Turlybekova. Qonaqtar sapynan tek Maral Artın gol soqty. Osylaısha, tórt kezdesýden keıin jerlesterimiz alǵashqy jeńisine qol jetkizdi. Al Tıraspolde ótken joldastyq kezdesýde elimizdiń jasóspirimder quramasy (U-19) Ázerbaıjanǵa 0:2 esebimen ese jiberdi.
- Bul kúnderi Fransııada «Krıterıým Dofıne» kópkúndigi ótýde. О́kinishke qaraı, «Astananyń» veloshabandozdary ázirge úzdikter qataryna ene alar emes. Úshinshi kezeńnen keıin Qazaqstannyń komandasy sapyndaǵy kolýmbııalyq legıoner Harold Tehada 23-oryndy qanaǵat tutýda. Sondaı-aq keshe Nıderlandta «ZLM Tour» dodasy bastaldy. Bul jarysta «Astananyń» namysyn Maks Kanter, Rıýdıger Zelıg (Germanııa), Gleb Syrısa (Reseı), Danııl Marýhın (Qazaqstan), Maks Ýoker (Ulybrıtanııa) jáne Davıde Toneattı (Italııa) qorǵaýda.
- «Opta» statıstıkalyq portaly sanaýly kúnderden keıin Germanııada shymyldyǵy túriletin fýtboldan Eýropa chempıonatynyń favorıtterin atady. Sýperkompıýterdiń esebi boıynsha bas júldeden basty úmitker – Anglııa quramasy. Olar 19,9 paıyzdyq basymdyqqa ıe. Ekinshi jáne úshinshi oryndarda – Fransııa (19,1 %) men Germanııa (12,4 %). Al Grýzııa (0,1 %), Serbııa (1,0 %) jáne Ýkraına (1,0 %) aýtsaıdarler sanatynda.
- 9 maýsymda Almatyda aralas jekpe-jekten «Nomad» týrnıri ótedi. Osy keshtiń basty básekesinde atalǵan promoýshende áli birde-bir ret jeńilmegen Aıdos Jappabergenov pen Juman Jumabekov chempıondyq belbeý úshin talasady.
