Jýyrda Petropavl qalasy polısııa basqarmasynyń esirtkige qarsy kúres bóliminiń basshysy, maıor Jangeldi Ápenov áleýmettik jelilerdegi tikeleı efıri arqyly jyl basynan beri 18 kılo esirtkini zańsyz aınalymnan shyǵaryp, kinálilerdi ustaý barysynda 104 adamǵa qatysty qylmysty is qozǵalǵanyn málimdedi. «Anyqtalǵan 54 derek esirtkini taratý, 4-eýi úlken kólemdegi esirtkini saqtaýǵa qatysty bolyp otyr. Tárkilengen 18 kılo esirtkiniń 4 kılosy sıntetıkalyq bolsa, 14 kılosy marıhýana», dedi ol.
Polısııa qyzmetkerlerin esirtki tasymaldaý isine kánigi nashaqorlardyń jasóspirimderdi tartýy alańdatyp otyr. Esirtki taratýshylar oń-solyn baǵamdap úlgermegen jetkinshekterdi «Ustasa da, kámeletke tolmaǵan saǵan kóp jyl bermeıdi, al ustaǵanǵa deıin qyrǵyn aqsha tabasyń» dep aldap, azǵyryp, áleýmettik jeliler, túrli chattar arqyly habarlar taratady. Mundaı jeńil «jumysqa» qalaı turyp, qyrýar aqshaǵa qaryq bolý úshin qaıda, kimge barý kerektigin de ózderiniń jasyryn ym-jym sózderi arqyly bildirip, qyzyqtyrady. Sosyn jasóspirimniń basyna jelik kirip, ońaı oljaǵa tezirek qol jetkizýge tyrysady. Kóbine turmysy tómen otbasylardan shyqqan jasóspirimder osyndaıǵa aldanyp, kóp aqshaǵa qyzyǵyp, bolashaq taǵdyryna ózderi balta shabady. Tipti aýyldy jerlerden esirtki taratý úshin qalaǵa keletin jetkinshekter de bar kórinedi.
«Jas býynǵa biz óz tarapymyzdan esirtki bıznesiniń qylmys ekenin áshkerelep, áleýmettik jeliler arqyly ótimdi habarlar uıymdastyramyz. Mundaı habarlama-túsiniktemelerdi túrli konkýrs, chellendj, sporttyq is-shara arqyly taratyp, jasóspirimniń sanasyna áserli etip jetkizýge tyrysamyz. Jyl basynan beri osyndaı baǵytta uıymdastyrylǵan 337 is-sharaǵa 15 myńdaı volonter men oqýshy qatysty. Sonymen qatar esirtki tabýdyń jolyn kórsetken 88 siltemeni buǵattadyq», dedi maıor J.Ápenov.
Internet-dúkenderden esirtki alyp, olardy ózderine belgili núktelerge jasyrý arqyly taratý jumysymen aınalysyp, aqsha tabýǵa jasóspirimder ǵana emes, tipti kámeletke tolǵan jastar da jaldanady. Jýyrda Aqmola oblysynan Petropavlǵa kelip, esirtki bıznesine «jumysqa turǵan» 17 jáne 20 jastaǵy eki jigit ustaldy. Olardyń jumys uzaqtyǵy bar bolǵany 3-aq aı boldy. Endi esirtki taratqandary úshin ekeýin de 15 jylǵa bas bostandyǵynan aıyrý jazasy kútip tur. Qazir eresegi qylmyskerdi qamaý oqshaýlaǵyshynda, al jasy úı qamaqta otyr. Ekeýi de esirtki bıznesindegilerdiń ótirigine aldanyp qalǵanyn aıtyp, shyr-pyr bolǵan. Petropavldaǵy jaldaǵan úılerinen 664 gramm mefedron jáne 358 gramm α-PvP dep órnekteletin sıntetıkalyq esirtki tabylǵan. Salmaǵy 1 kg-dan asqandyqtan bul esirtkini úlken kólemde taratý dep baǵalanady. Sóıtip, Petropavlǵa kelip, ońaı aqshaǵa qaryq bolamyz degen eki jas endi 15 jyl bas bostandyqtarynan aıyrylýy múmkin.
Al oblystyń bir aýdanynan qalaǵa kelip, osyndaı «jumysqa» turǵan 23 jastaǵy jigittiń esirtki taratýmen aınalysýy bar bolǵany bir-aq aptaǵa sozylǵan. Petropavldyń garaj kooperatıvteriniń biriniń arasynda júrgen ony polıseıler «Bella» degen ıttiń kómegimen ustap, taratýǵa alyp shyqqan 25 túıinshekti tárkiledi. Bular salmaǵy 28 gramm bolatyn mefedron atty sıntetıkalyq esirtki eken. «Endi bul adam esirtkini asa úlken kólemde taratqany úshin 10-nan 15 jyl merzimge deıin bas erkinen aıyrylýy múmkin», dedi oblystyq PD esirtkige qarsy kúres basqarmasynyń basshysy, podpolkovnık Rýslan Saparov.
Al byltyr qarasha aıynda osyndaı qylmyspen ustalyp, sottyń sheshimin kútip jatqan qaladaǵy kolledjderdiń birinde oqıtyn 17 jasar jetkinshek jýyrda 5 jylǵa bas erkinen aıyryldy. Sot onyń basqa qylmystardy ashýǵa tergeý oryndarymen yntymaqtasqanyn jáne jasynyń áli 18-ge tolmaǵanyn eskerip, jazany barynsha jeńil bergen. Sonyń ózinde «jeńil aqsha» tabamyn degen jigit bes jyl ómirin qapasta ótkizedi. Polısııa qyzmetkerleri esirtkini túıinshekpen jasyrýǵa jaldanatyndardyń «jumys ýaqyty» kóp bolsa úsh aıǵa sozylatynyn aıtady. Sodan keıin báribir qolǵa túsedi.
Soltústik Qazaqstan oblysy
