Memleket basshysy Qasym-Jomart Toqaev Ulttyq quryltaıda azamattardyń jekelegen sanattary úshin qumar oıyndarǵa qatysty shekteýlerdi kúsheıtýdi tapsyrǵan edi. Jeńil jolmen aqsha tapqysy kelip, tapqan-taıanǵanyn jelge ushyryp jatqan jandarǵa Sıfrlyq damý, ınnovasııa jáne aeroǵarysh ónerkásibi mınıstrligi, Týrızm jáne sport mınıstrliginiń Týrızm ındýstrııasy komıteti, «Ulttyq aqparattyq tehnologııalar» aksıonerlik qoǵamy birlese qumar oıynnyń quryǵynan qutylýdyń onlaın formatyn usyndy.
Jańa qyzmetti resimdeý úshin «eGov mobile» mobıldik qosymshasynda «Qyzmetter», sodan keıin «Sport» bólimine ótý kerek. Sodan soń «Qumar oıyndarǵa nemese bás tigýge qatysýdy shekteý jónindegi servısti» tańdaısyz. Ashylǵan bette shekteý merziminiń ýaqytyn anyqtap, «Qyzmetke tapsyrys» túımesin basý qajet. Ári qaraı jyldam qol jetkizý kodyn nemese bıometrııany paıdalanyp qyzmetke qol qoıasyz. Osylaısha, ótinim mártebesimen tanysa alasyz. Aıta keteıik, qumar oıyndarǵa qatysýyn shektegisi keletin azamattar ótinimdi ESQ arqyly berýge tıis. Úshinshi tulǵalardyń ótinim berýine jol berilmeıdi.
«Ulttyq aqparattyq tehnologııalar» AQ basqarma tóraǵasy Rostıslav Konıashkınniń aıtýynsha, bul qyzmet lýdomanııamen baılanysty jeke máselelerdi aıtarlyqtaı tómendetedi. Osylaısha, kez kelgen azamatqa, ásirese qumar oıyndarmen shekten tys áýestenetin tulǵalarǵa barlyq lısenzııalanǵan oıyn mekemesi men býkmekerlik keńselerdiń zańdy saıttaryna kirýge tosqaýyl qoıylady.
