«Halyq zańgerinen» keńes alǵandar kóp

«Halyq zańgeri» aksııasy dástúrli túrde 2016 jyldan beri ótip keledi. Kúni búginge deıin osy is-sharaǵa 8 myńnan astam úzdik sarapshy men túrli memlekettik organ ókilderi qatysyp, quqyqtyq kómekke júgingen 165 myńnan astam turǵyn keńes alǵan.

Sybaılas jemqorlyqqa qarsy qyzmet agenttigi prevensııa qyzmeti basshysy­nyń orynbasary Jiger Baıgeldın­niń aıtýynsha, «Halyq zańgeri» respýblıkalyq aksııasy­­­nyń bas­ty maqsaty – halyqtyń quqyq­tyq saýattylyǵyn arttyrý, tegin quqyqtyq kómek kórsetý.

«Naýqanǵa qalamyzdyń 80-ge jýyq bilikti zańgeri men memleket qyzmetshisi jınalyp otyr. Sonymen qatar zańgerler turǵyndardan túsken quqyqtyq suraqtar boıynsha túsindirme jumystaryn júrgizilip jatyr. Sybaı­las jemqorlyqqa qarsy is-qımyl agenttigi bul aksııaǵa jyl saıyn belsendi qatysady. О́ıtkeni turǵyndarǵa quqyqtyq kómek kórsetý prevensııa jumysynyń bir baǵyty sanalady. Jurtshylyq kóbine-kóp jer, PIK, MIB máse­­­­lelerimen kelip jatyr. Osy naýqanda túsken suranystar bo­ıynsha turǵyndarǵa tıisti keńes beremiz. Máseleniń sheshim tabýyn­ sońy­na­ deıin baqylaımyz», deıdi J.Baıgeldın.

Naýqan bastalarda keńes alýǵa kelgender kóp bol­dy. Ár adamǵa jeke advokat­tar, memleket qyzmetshileri men­ notarıýstar kómek kórset­­ti. Biri­nen shyǵyp, ekinshi mamanǵa júgingen turǵyndar jeterlik. Olardyń ishinde turǵyn úı, muragerlikti zańnamalyq retteý, alaıaqtyq, jeke tulǵalardyń bankrottyq rásimderi, alıment syndy máselelermen júgingender qarasy qalyń. Mysaly, Astana qalasy turǵyn úı jáne turǵyn úı ıns­peksııa basqarmasynyń mamany­ Sapar Ádiljannyń aıtýyn­sha, qarapaıym, úı kezegin bilýge keletinderdiń ózi az emes kórinedi.

«Turǵyn úı máselesi boıynsha keńes alýǵa keletinder jyl saıyn kóbeıip jatyr. Azamattar arasynda turǵyn úı kezegi boıynsha, atap aıtqanda, kezekke turý máselesine qa­tys­ty suraqtar kóp. Osyǵan qosa memlekettik turǵyn úı baǵ­dar­lamalaryna qatysty suraq­tar tústi. Qoıylǵan saýal­darǵa tolyq jaýap berýge tyrys­tyq. Degenmen birli-ekili sheshimin tappaǵan suraq boldy. Alda olar boıynsha baılanysqa shyǵyp, resmı jaýap qaıtaramyz. Bizge kelgen ár adamnyń ótinishi jerde qalmaıdy», deıdi S.Ádil­jan.

Aksııa barysynda tegin keńes alýǵa kelgen árbir turǵynǵa maman­­dar quqyqtyq, zańgerlik kómek kórsetti. Al keıbir kúrdeli máselelerge qatysty saýaldardy quzyrly or­gan­dar tirkep, sońyna deıin jetkizýge ýáde berdi.

Janııa Ábil,

L.N.Gýmılev atyndaǵy EUÝ stýdenti