Bıylǵy sáýir aıynyń alǵashqy kúni Oral qalasynda kámeletke tolmaǵan bala «Lada 219220» avtokóliginiń róline otyryp alyp, Ábilqaıyr han dańǵylynyń boıynda, dál aıaldama janynda 37 jastaǵy jaıaý júrginshini qaǵyp ketti. Jol-kólik oqıǵasy saldarynan jaıaý júrginshi aýrýhanada qaıtys boldy.
11 mamyrda Aqsaı qalasynda kámeletke tolmaǵan taǵy bir jasóspirim «Suzuki» markaly avtokóligimen 3 jasar balany qaǵyp ketti. Baıǵus bala da alǵan jaraqaty saldarynan aýrýhanada kóz jumdy.
27 mamyr kúni keshkisin Oral qalasyndaǵy Chaıkın jáne Kókshetaý kósheleriniń qıylysynda skýter men «Hyundai» markaly avtokólik soqtyǵysqan. Skýterdiń kámeletke tolmaǵan júrgizýshisi men jolaýshysy túrli dene jaraqatymen aýrýhanaǵa jetkizildi.
– Osy aıtylǵan barlyq fakt boıynsha qylmystyq is qozǵaldy. Qazir tergeý júrgizilip jatyr. Onyń qorytyndysymen apatqa qatystylardyń árqaısysynyń kinási anyqtalady, – deıdi Batys Qazaqstan oblystyq polısııa departamenti jergilikti polısııa qyzmeti bastyǵynyń orynbasary Bolat Jańabaev.
Polısııa ata-analar men zańdy ókilder tarapynan kámeletke tolmaǵandarǵa tıisti baqylaý bolmaı tur deıdi. Sondyqtan joǵarydaǵy jol-kólik oqıǵalaryna kináli bolǵan jasóspirimderdiń ata-anasy da qylmystyq jaýapkershilikke tartylýy múmkin.
Bıyl jyl basynan beri oblysta 228 jol-kólik oqıǵasy tirkelse, onyń saldarynan 27 adam qaza taýyp, 318 adam jaraqat alǵan. Sonyń ishinde balalardyń qatysymen 46 jol-kólik oqıǵasy bolypty. Nátıjesinde, tórt bala qaza taýyp, 54-i túrli dene jaraqatyn alǵan. Osyǵan baılanysty jergilikti polısııa júrgizýshiler men jas júrginshilerge jolda asa muqııat bolý qajettigin eskertedi.
Batys Qazaqstan oblysy
