Foto: t.me/tipavlo
Pavlodar oblysy polısııa departamenti jergilikti polısııa qyzmetiniń bastyǵy Qýanysh Mustafınov habarlaǵandaı, Pavlodar-Aqsý avtojolynda 15 jastaǵy eki jasóspirim mingen skýter «KamAZ»-ǵa soǵylǵan.
«Apat saldarynan tehnıka rýlinde otyrǵan bala sol jerde til tartpaı ketken. Al ekinshisi jedel járdem kóligimen Pavlodar qalasyndaǵy №1 aýrýhanaǵa jetkizilgen. Alaıda alǵan jaraqaty aýyr bolyp, aýrýhanada kóz jumdy», dep málimdedi polısııadan. Oblystyq jedel járdem stansasynyń ókilderi kólik apaty joldyń Qarabaı aýyly aýmaǵynda bolǵanyn aıtady.
Eki jedel járdem brıgadasy jumyldyrylyp, olar oqıǵa ornyna 9 mınýtta jetken. О́kinishke qaraı, medısına qyzmetkerleri eki jasóspirimniń de ómirin saqtap qala almady.
Atalǵan oqıǵa boıynsha polısııa qylmystyq is qozǵady. Jol-kólik apatynyń sebep-saldary jiti tekserilip, sot-medısınalyq saraptama taǵaıyndaldy.
Jalpy, jyl basynan Ertis-Baıan óńirinde jol apatynan 3 bala qaza tapqan. Taǵy 41 jasóspirim apat saldarynan jaraqat alǵan. Al balalardyń qatysýymen jalpy sany 36 jol-kólik oqıǵasy tirkelgen. Tártip saqshylary jazǵy demalys kezeńinde eresekterden balalardyń qaýipsizdigin turaqty nazarda ustaýdy surap otyr. Oqıǵalardyń 70 paıyzynda jaıaý júrginshiler kináli bolady eken. Sońǵy ýaqytta rýlinde jasóspirimder otyrǵan motosıklderdiń, skýterlerdiń qatysýymen keleńsiz oqıǵalar jıilep ketken.
«Balalar óz emosııalaryn basqara almaıdy, draıvqa kóbirek súıenedi, jyldamdyq rejimin saqtaı almaıdy. Al munyń sońy aýyr zardaptarǵa ákeledi», deıdi polıseıler.
Pavlodar oblysy
