Foto: okg.kz
Memleket basshysy el aınalasynda ónim ótkizetin óte úlken naryqtar bar ekenin, onda sapaly azyq-túlik ónimderi tapshy bolyp turǵanyn aıtqan edi. Bul oraıda Prezıdent aldaǵy úsh jyl ishinde agroónerkásiptegi óńdelgen ónim úlesin 70 paıyzǵa jetkizý mindetin júktedi. Kerekýlik fermerler atalǵan maqsat údesinen shyǵý úshin kartop óńdeý isine basymdyq berip otyr. Bul úshin eń áýeli óńirde kartop qytyrlaǵyn shyǵaratyn zaýyt turǵyzý josparlandy. Bastamany jergilikti kompanııalardyń biri qolǵa almaqshy. Kásiporyn iske qosylsa, jylyna 20 myń tonnaǵa deıin kartop qytyrlaǵyn shyǵarýǵa bolady.
«Zaýyt 2025 jyly Aqsý qalasynda ashylýy kerek. Jobany «Chips Asia» JShS júzege asyrady. Qazir jer telimi resimdelgen, tehnıkalyq sharttardy alý boıynsha jumystar júrip jatyr. Iri kartop ósirýshilerdiń biri «Aqtoǵaı-Agro» JShS byltyr eksperıment retinde qytyrlaq óndirýge arnalǵan kartoptyń «Fontane» sortyn 500 gektarǵa egip, 9 myń tonnadaı ónim jınady. «Aqtoǵaı- Agro» – «Chips Asia» kompanııasy quryltaıshylarynyń biri. Sondyqtan bul joba ýaqytynda júzege asady degen oıdamyz», deıdi óńirlik aýyl sharýashylyǵy basqarmasy basshysynyń orynbasary Sáýle Shúkirova.
Atap óteıik, byltyr kúzde kerekýlik kartop ósirýshiler tyǵyryqqa tireldi. Fermerler 806,4 myń tonna «ekinshi nan» jınap aldyńǵy jylǵy rekordty birden 133 myń tonnaǵa jańartqan edi. Alaıda ala jazdaı baptap ósirgen jer yrysyn jyldaǵydaı kórshiles elderge tonnalap satyp almaı qaldy. Reseıde kılogramy 25 teńgeden satylsa, ishki naryqtaǵy kóterme baǵa kılogramyna 58-65 teńgeden bolǵany málim. Mundaı tıimsiz baǵa kóptegen sharýashylyqtyń shyǵynyn jabýǵa múmkindik bermeı, saldarynan keı fermerler zor shyǵynǵa ushyrady. Aımaqta kartop ósirýmen 142 sharýashylyq shuǵyldansa, onyń 96-sy – iri fermerlik sharýashylyqtar. Oblysta jalpy syıymdylyǵy 495 myń tonnany quraıtyn 149 kókónis saqtaıtyn qoıma bolsa, onyń ishinde 455 myń tonna ónimdi zamanaýı jabdyqtalǵan qoımalarda saqtaýdyń múmkindigi bar. Chernoıarka alqabynda 1-2 gektardan kartop salatyndar da bar. Mundaı usaq sharýa qojalyqtary úshin óz ónimderin satýda bıyl da qıyndyqtar týyndaýy múmkin dep boljap otyr mamandar.
Aýyl sharýashylyǵy basqarmasy qaıta óńdeýdi jáne kooperasııany damytý bóliminiń bas mamany Tatıana Nagýla oblys turǵyndary jylyna nebári 75,5 myń tonna kartop tutynatynyn aıtady. Al byltyr jınalǵan kartop bul suranystan 12 ese asyp túsken. Bıyl Ertis-Baıan óńirinde jalpy quny 50 mlrd teńgeden asatyn 35 ınvestısııalyq joba júzege asyp jatyr. Jyl sońyna deıin 90 myń tonna ónim syıatyn 10 kókónis saqtaý qoımasy ashylady dep josparlanǵan.
Pavlodar oblysy
