5 maýsym kúngi derekke júginsek, «Merki ormandary jáne janýarlar dúnıesin qorǵaý mekemesi» Saryqoba ormanshylyǵyndaǵy órttiń jaıylý kólemi 1 750 gektarǵa jetken. Tilsiz jaýmen kúresý úshin óńir basshysynyń orynbasary Qanatbek Mádibek bastap, basqa da atqaminerler qoshtap, oqıǵa ornyna jedel jetken.
«Merki orman jáne janýarlar dúnıesin qorǵaý mekemesi» KMM-ǵa qarasty Saryqoba ormanshylyǵynda qurǵaq shópter men butalar órtendi. Tilsiz jaýmen kúreske barlyǵy 244 adam jáne 50 tehnıka tartyldy. Onyń ishinde jergilikti jerde orman sharýashylyǵy qyzmetkerlerinen 100 adam jáne 13 traktor, 2 avtosısterna, sondaı-aq 12 jeńil avtomobıl, «Qazavıaqorǵaýdyń» 1 tikushaǵy jáne 6 qyzmetkeri jumys istedi. Sondaı-aq TJD jeke quramynyń 84 adamy men 9 tehnıkasy jumyldyryldy. Qosymsha orman sharýashylyǵynan 31 adam, 6 jeńil avtokólik, jergilikti atqarýshy organdardan 26 adam, 10 tehnıka oqıǵa ornyna shyqty.
«Merki ormandardy jáne janýarlar dúnıesin qorǵaý jónindegi mekemesi» KMM Saryqoba ormanshylyǵynda 1 800 gektar aýmaqty qamtyǵan órt 5 maýsym kúni tańerteń oqshaýlandy. Eldi mekenderge qaýip tónip turǵan joq», delingen jergilikti atqarýshy bılik keltirgen resmı málimette.
Qalaı desek te, jazdyń alǵashqy aıyn jambyldyq sheneýnikter tilsiz jaýmen kúresýden bastap otyr. Shilińgir shilde aıynda aýa raıy 40 gradýstan asyp jyǵylatyny anyq. Árıne, órttiń betin aýlaq qylsyn, dese de jaýapty mekemeler kez kelgen jaǵdaıda tilsiz jaýmen kúreske saqadaı saı daıyn bolǵany jón.
Jambyl oblysy
