Júregi oń jaǵyndaǵy jigit

Qalaı bilmeı júrgenbiz?.. «Kaztalov aýylynda adam tabı­ǵatynda sırek kezdesetin júregi oń jaqta ornalasqan azamat bar», degen áńgimeni estigende senbedim. Al ol kim deısiz ǵoı?... Aýdandyq kitaphana ǵımaratynda kúzetshi bolyp isteıtin Talap Nyǵmetovtiń 36 jasqa tolyp ketken Amangeldi degen uly. Aǵanyń úıine bardym. Zaıyby Roza apaı qarsy aldy. Kelgen sharýamdy aıtqannan keıin: «Iá, bári durys, balamyzdyń júregi oń jaqta. Basqa balalarymdaı erjetti. Qazirgi kúnde otbasyly. Oral qalasynda turady. Densaýlyǵynda esh aıyrmashylyq joq», – dedi. Apaıdan keıin Talap aǵa áńgimege aralasty. «Mynandaı qyzyq aıtaıyn, – dedi. – Aman­geldiniń 10 jastaǵy kezi. Balam qoranyń janynda oınap júrgen. Sol kezde aýyldaǵy tentek buqa irgesine sý ketip turǵan qoranyń janyna súıkendi. Qulaǵaly turǵan qoranyń jaqtaýy buqanyń kúshine shydasyn ba? Qabyrǵa balanyń ústine qulady. Ony topyraqtyń astynan shyǵarǵan soń, dárigerge alyp bardyq. Jańadan kelgen jas hırýrg Oraz Sarıev balanyń júregin tyńdady. Júrek soqpaǵannan keıin, ol shoshyp ketti. Mán-jaıdy jáne balanyń esepte turǵanyn bilgennen keıin em qabyldady. Osy qyzyq jaıt esimizde qaldy». Qazirgi kúnde Amangeldi qu­rylys jumysynda istep júr eken. Biraq, aıtýynsha denesine kúsh túsetin kórinedi. О́ıtkeni, júregi oń jaqtaǵylar solaqaı bolýy kerek eken. Sonda denege kúsh túspeıdi degen ustanym bar. Budan keıin Kaztalov orta­lyq­tandyrylǵan aýrýhana dı­rektorynyń orynbasary Botagóz Ǵumarovany áńgimege tarttyq. – Amangeldi Nyǵmetov dári­gerlik esepte turady. Jyl saıyn baıqaýdan ótkizemiz. Densaýlyǵy qalypty. Mundaı jaǵdaılar adamdarǵa tuqym qýalaýshylyq arqyly beriledi. Aýdanymyzda júregi oń jaqta ornalasqan bir ǵana adam osy azamat bolyp tabylady. Adam balasynyń qýan­ǵanda, qaıǵyrǵanda júregi atsha týlaıdy. Sol kezde bári de sol jaǵyn ustaıtyny anyq. Amangeldige densaýlyǵyń myqty bolsyn deımiz. Gúlfııa KО́ShBAEVA, jýrnalıst. Batys Qazaqstan oblysy, Kaztalov aýdany.