Resmı málimet boıynsha, Qazaqstanda tutyný nesıesin 8,4 mıllıon adam paıdalanady. Onyń ishinde 1,5 mıllıon adam nesıesin ýaqytynda tóleı almaıdy. О́tken aptada parlament nesıeleýdegi táýekelderdi azaıtý týraly zań qabyldady.
Qazaqstan Respýblıkasy Qarjy naryǵyn retteý jáne damytý agenttigi (QNDRA) basshysynyń orynbasary Oljas Qızatov jýrnalıstermen kezdesken kezde bul zań merzimi ótip ketken nesıesi bar azamattardyń máselesin qalaı retteıtinin aıtyp berdi.
«Qazirgi tańda 1,5 mıllıon adamnyń bankterden, mıkroqarjy uıymdarynan jáne kollektorlyq agenttikterden 90 kúnnen astam tólenbegen qaryzy bar. Endi nesıe berýshilermen jumys isteý kerek. 1,5 mıllıon halyqtyń arasynda zeınetkerler, kóp balaly analar, múmkindigi shekteýli jandar bar. Biz qaryzy bar osal adamdardy anyqtaımyz jáne nesıe berýshilermen nesıeni keshirý týraly sóılesemiz. Biz olarǵa nesıeni keshirý mindetin qoıa almaımyz», dedi ol.
Onyń aıtýynsha, mıkroqarjy uıymdary bolsyn, barlyǵy birdeı qaryzdy keshire bermeıdi. О́ıtkeni olardyń kapıtaly azaıýy múmkin. Keıbireýlerge qaryzyn bólip tóleýge múmkindik berý, al basqalarǵa belgili bir somany keshirý tárizdi nusqalar qarastyrylyp jatyr.
Qızatov endi otandastarymyzdyń nesıesi keshiriledi dep naqty aıtý múmkin emestigin, muny kredıtorlardyń ózderi sheshedi dep basa aıtty. Onyń aıtýynsha, problemalyq nesıeler boıynsha tıisti jumystar jyl sońyna deıin aıaqtalady.
Sonymen qatar, QNDRA tutynýshylyq nesıelerdiń maksımaldy somasyn shekteýdi jáne merzimi ótken nesıeleri bar boryshkerlerge tyıym salýdy josparlap otyrǵan aıtty.
«Bolashaqta qarjylyq qıyndyqtarǵa tap bolatyn jańa qaryz alýshylar bolmaýy úshin biz zańmen tyıym salǵymyz keledi: eger onyń basqa bankten nemese mıkroqarjy uıymynan merzimi ótken nesıesi bolsa, onda problemalyq nesıeni japqanǵa deıin jańa nesıe alýǵa tyıym salý kerek.
Sondaı-aq tutynýshylyq nesıeniń maksımaldy mólsherin shektegimiz keledi. Olardyń kóbine 100 mıllıon teńgeden asatyn, keıde 1 mıllıard teńgege jetetin somaǵa shyǵarylatynyn kórip júrmiz. Bul bıznes úshin alynǵan nesıe bolsa kerek. Qazaqstan halqynyń nesıelik qaryzyn kóbeıtpeý úshin biz tutynýshylyq nesıeniń joǵarǵy shegin shektegimiz keledi», dedi Qızatov.
Bul rette QNDRA tóraǵasynyń orynbasary atalǵan lımıt áli belgilenbegenin túsindirdi. Bul másele bank qaýymdastyǵymen birlesip zerttelip jatyr.
