Tranzıttik áleýet artady

Jaqynda «Qazaqstan temir joly» UK» AQ-ta 2014 jyldyń jumys qorytyndysy men 2015 jylǵa arnalǵan basymdyqtar boıynsha keńes ótkizildi. Keńes barysynda QTJ prezıdenti Asqar Mamın kompanııanyń ótken jylǵy jumys qorytyndysyn jasap, 2015 jylǵa arnalǵan basym­dyqtary týraly baıandady. «Kompanııa jalpy júk tasy­malynyń tómendegenine qaramastan 2014 jyldy 166,5 mlrd. teńge taza kirispen qorytyndylady. Ol jos­parly kórsetkishtiń 56% paıyzǵa artqan­dyǵyn kórsetedi. Bul túsim qosymsha júkterdi tartý, kommer­sııalyq tranzıttik júkterdiń kóbeıýi, sonymen qatar shyǵyndardy 61 mlrd. teńgege qysqartý arqyly oryndaldy. Jalpy júk tasymalynyń tómendeýi qazaqstandyq eksporttyq taýarlarǵa halyqaralyq naryqtan suranystyń azaıýy, aımaqtaǵy saýda kóleminiń tómendeýinen oryn aldy», dep atap ótti A.Mamın. «Qazirgi tańda, kompanııa kirisiniń 25% tranzıttik tasymaldan túsken. Biz ony taıaý bolashaqta 50%-ǵa deıin kó­te­rýimiz kerek», dep tolyqtyrdy osy oraıda kompanııa basshysy óz sózin. «2014 jyl kompanııanyń sońǵy jyldary júrgizip jatqan stra­tegııa­lyq damý baǵdarlamasynyń tıimdiligin ári durystyǵyn ýaqyt kórsetti. Kom­panııa uzaq mer­zimdi damý kezeńinde ishki jáne halyqaralyq naryq­ta mýltımo­daldyq jáne tranzıt­tik tasymal­dardyń úlesin arttyrady. Oǵan joǵary sapaly básekeles­tikke saı kóliktik-logıstıkalyq qyzmet ónimin, dástúrli tájirıbelerdi jetildire otyryp saladaǵy álemdik jetekshi kompanııalardyń deńgeıine deıin kóterýimiz qajet», dedi ol. Kompanııa byltyr asa iri jobalardy júzege asyrdy. Onyń ishinde jalpy uzyndyǵy 1200 shaqyrymdyq Jezqazǵan – Beıneý jáne Arqalyq –Shubarkól, sondaı-aq, paıdalanýǵa berilgen transqurlyqtyq «О́zen – Bereket – Gorgan» jol teliminiń qazaqstandyq bóliginiń qurylysy 2013 jyly aıaqtalǵan bolatyn. Aqtóbedegi rels-arqalyq zaýyty resmı túrde ashyldy. «Qorǵas-Shyǵys qaqpasy» AEA qurǵaq portynyń 1-shi kezegi paıdalanýǵa berilip, Lıanıýngan teńiz portyndaǵy logıstıkalyq termınaldyń qu­rylysy aıaqtaldy. Borjaqty – Ersaı temirjol jelisiniń qurylysy bastalyp, Astana men Shymkent qalalarynda kóliktik-logıstıka­lyq ortalyqtardyń qurylysy júrgizilýde. Strategııanyń kezeń-kezeńine oraı, transformasııalyq basqarý júıesine kóshý, tapsyrys berýshilerdiń yńǵaıyna qaraı beıimdelý úderisterine sáıkes qyzmet kórsetý tıimdiligi men sapasyn kóterý, korporatıvtik mádenıetti jasaqtaý jalǵasýda. Keńesti qorytyndylaı kelip, Asqar Mamın Elbasy Nursultan Nazarbaevtyń «Nurly Jol – bola­shaqqa bastar jol» atty Qazaqstan halqyna Joldaýyndaǵy tapsyrmalardy tııanaqty oryndaýǵa toqtaldy. «Aldaǵy bes jylda memlekettik daǵdarysqa qarsy jospardy júzege asyrýda kóliktik ınfraqurylymdy damytýǵa basa nazar aýdarylǵan. Biz kompanııany damytýdyń barlyq strategııalyq baǵyttarynda jumys­tarymyzdy belsendilikpen atqaryp, kóliktik ınfraqurylymdy jedel damytyp, kóliktik-logıstıkalyq básekelestikke saı qyzmetti jasaqtap, elimizdiń tranzıttik áleýetin júzege asyrýymyz qajet», dep kompanııa basshysy basym baǵyttarǵa toqtaldy. «Egemen-aqparat».