Telefon tozady, kitap ozady

«Kitap oqymaıtyn adam­nyń oqı almaıtyn adamnan aıyr­mashylyǵy joq» degendeı, qazir qoǵamnyń deni sa­ýatty, alaıda kórkem áde­bıetti oqıtyndardyń qarasy az. Ras, qurmetin kórsetip, iltıpatyn bildirip turady, biraq eki-úsh paraqtan keıin shydamy taýsylady da, nazary basqa jaqqa aýyp, janary jyltyraqty izdeı bas­taıdy. Sondyqtan adam men kitaptyń arasyna syna qaǵyp, dostyǵyna jaryqshaq túsirgen – áleýmettik jeli desek qatelespeımiz. Úlken-kishini buǵaýlap alyp, joq, baý­rap alyp, vırtýaldy álem­ge kóshirip jibergen jańa tehnologııalar kitaptyń myń­ jyldyq saltanatyna­ bir­­sha­ma bógesin qoıdy. Álbet­te ınternettiń ıgiligin joq­qa shyǵarmaımyz, degenmen ǵalamtordyń bereri qan­sha bolsa, alary da sonsha. Qazir balalardyń beıne oıyndar­ǵa áýestigi ata-analardyń negizgi ýaıymyna aınaldy. «Áleýmettik jeli jetkinshektiń minez-qulqyna, tanym-túsinigine, mentaldi hám fızıkalyq saýlyǵyna teris áser etip jatyr», dep shyr-pyr bolady qaıran áke-sheshe. Úlkenderdiń ózi de kúndiz-túni WhatsApp aqtaryp, Instagram qoparyp, vırtýaldy álemge qashan ári qalaı shomyp ketkenin baıqamaı qaldy. Biraq árbir ata-ana balasynyń kózi men qulaǵyn, sanasy men rýhyn qorǵaýǵa mindetti ekenin umytpaǵany lázim. Sebebi ǵalamat jetis­tik retinde jarnamalanyp jatqanymen, beıne oıyndar túgili, ıýtýbtaǵy mýlt­fılmder de aqyl qospaıdy, qııaldy baıytpaıdy, sózdik qoryn damytpaıdy, synı oılaýǵa baýlymaıdy. Buryn da, qazir de, ıntellektýaldyq óreni kóteretin, minezdi berik qylatyn, eresek tartqan sha­ǵynda jaqsy orta tabýy­na septesetin – kitap qana, kórkem ádebıet qana, klassıkalyq eńbekter ǵana. Kózi qaraqty eshbir adam bul aqıqat­ty joqqa shyǵara almaıdy. Endeshe, balańyzdyń ınternette otyratyn ýaqytyn shekteýde turǵan eshbir sókettik joq. Osy maqsatta bıyl Oqý-aǵartý mınıstrligi de bala­lardyń jazǵy demaly­­syn qyzyqty ári paıdaly ótkizýge arnalǵan «Seniń qýanyshqa toly jazǵy dema­lysyń» atty Guidebook kitapshasyn ázirledi. Atalǵan ádisteme toǵyz bólimnen turady: «Jaz kitappen birge», «Seniń qaýipsiz jazyń», «Tanymdyq jaz», «Seniń ómir saltyń – salamatty ómir salty», «Jaz – ónerdiń, shyǵarmashylyqtyń jáne sulýlyqtyń qyzyqty álemi», «Jaz – ózin-ózi damytý ýaqyty», «Seniń alǵash­qy jeke kúndeligiń», «О́z qolyń­men jazǵy syılyq jasa», «Jazǵy oıyndar». Taraýlardyń ataýynan-aq oqý­shylarǵa paıdaly kitap­sha ekenin ańǵaramyz. Atalǵan mınıstrlikke qaras­ty tárbıe jumysy jáne qosymsha bilim departamenti dırektorynyń orynbasary Stella Ibraeva ádistemelik jınaq jóninde: «Balalardyń jas erekshelikteri eskerile otyryp, 1–4, 5–9, 10–11 synyp oqýshylary úshin «Seniń qýanyshqa toly jazǵy dema­lysyń» Guidebook jı­na­ǵy­nyń úsh nus­qa­s­y ázirlendi. Onyń árbir paraǵynda QR-kodtar orna­las­tyrylǵan, sol arqyly oqýshy berilgen taqyryptar týraly aqparat ala alady. Munda ortalyq memlekettik organdarmen bekitilgen balalarǵa arnal­ǵan jazǵy saýyqtyrý orta­lyq­tarynyń da tizimi berilgen», dedi. Guidebook-tiń elektrondy nusqasyn Oqý-aǵartý mınıstrliginiń, sondaı-aq óńirlik bilim basqarmalary men bilim uıymdarynyń resmı saıttarynan alýǵa bolady.

Bul kitapshany aıtyp­ otyrǵan sebebimiz, myń shaqy­rymdyq jol alǵashqy qadam­nan bastalatyny sekildi, osyn­daı shaǵyn ári tanymdyq shyǵarmalar arqyly bala­lar­dyń kitapqa degen yntasy arta túsedi. Keıin óse kele kórkem áde­bıetti, klassıkalyq eńbek­terdi qunyǵyp oqıtyn deń­geıge jetedi. Osylaısha, búgin jetim qozydaı shette, qaraýsyz qalǵan kitap kún­der­diń kúninde ózine laıyq oryndy qaıta tabady.