Mysaly, túlkibastyq túlekter taǵy da bir otbasyn qýanyshqa bóledi. Igi dástúrdi jalǵaǵan Abaı atyndaǵy bilim oshaǵy men B.Sadyqov jáne M.Lomonosov mektebiniń 20 jyl buryn túlep ushqan túlekteri birigip, muqtaj otbasyna aýdan ortalyǵynan 5 bólmeli baspanany, qora-jaıymen qosa syılady. Ortadan 10 mln teńgeden astam qarajat jınap, sonyń 9 mln teńgesine úı alǵan túlekter ony tolyq jóndeýden ótkizip, ishin qajetti jıhaz-tehnıkalarmen jabdyqtap berip otyr. Saýapty isti uran qylǵan túlkibastyqtar baspana kiltin sol úıdiń aýlasynda qudaıy as berip, Abdýlaevtar otbasyna tabys etti. Jas otbasy osy kezge deıin jaldamaly páterde turyp kelgen. Shara sońynda muqtaj janǵa kómek berý, qaıyrymdylyq jasaý – ata-babamyzdan bizge mura bolyp qalǵan asyl qasıet dep sanaǵan 2004 jylǵy mektep túlekteri dástúr boıynsha estafetany 2005 jylǵy túlekterge tabystady. Aıta ketelik, osydan 7 jyl buryn Túlkibas aýdany Abaı atyndaǵy mektep-lıseıiniń mektepti bitirgenderine 20 jyl tolǵan túlekteri turǵyn úıge qol jetkize almaı júrgen kópbalaly otbasyna úı syılaǵan bolatyn. Osylaısha, kópshilikke úlgi bolarlyqtaı ıgi ister óz jalǵasyn tabýda.
Sozaq aýdany, Sozaq aýylyndaǵy Álisher Naýaı atyndaǵy bilim ordasynan 2004 jyly qanat qaǵyp, úlken ómirge qadam basqan túlekter de kópbalaly otbasyna turǵyn úı syılady. Taǵylymdy sharaǵa qatysqan aýdan ákimi Muhıt Turysbekov ıgi iske uıytqy bolǵan túlekterdi alǵys hatpen marapattady. Sozaq aýylynan berilgen jańa baspana 5 bólmeli. Ishki bólmeleri qajetti turmystyq jabdyqtarmen qamtylǵan. Sý, jylý syndy kommýnaldyq qyzmetteri júrgizilgen. Jer ýchaskesi – 15 sotyq. Úıdiń aýmaǵyna qosalqy sharýashylyqty damytý men baý-baqsha ósirýge múmkindik bar. Al Sozaq aýylyndaǵy Sozaq mektep-gımnazııasyn bitirgenine 20 jyl bolǵan túlekter Sozaq-Sholaqqorǵan baǵytyndaǵy jol boıyna aýylǵa kórik berer ásem qaqpa turǵyzdy. Jańadan turǵyzylǵan sáýletti qaqpanyń bıiktigi – 6,5, eni – 13 metr. Aýyldyń aty jazylǵan jazý men qaqpa aýmaǵyna túngi jaryqshamdar ornatylǵan. О́tken jyly túlekter turǵyzǵan Rámizder alleıasyna qarama-qarsy salynǵan qaqpanyń sáni men sáýleti kelisip, aýyldyń ajaryn asha túsken. Kentaý qalasyna qarasty Hantaǵy aýlyndaǵy №6 A.S.Pýshkın atyndaǵy jalpy orta mektebiniń osydan 20 jyl burynǵy túlekteri bilim ordasyna sport alańyn tartý etti. Odan bólek, mekteptiń ishine rámizder alańyn jasap bergen. Al Ordabasy aýdanynyń ortalyǵy Temirlanda Sh.Ýálıhanov, A.Imanov jáne Q.Bektaev mektepteriniń 2004 jylǵy túlekteri muqtaj otbasyna baspana syılady. Baspanaǵa muqtajdardy tańdaý úshin «Igilik» qoǵamdyq qory 8 otbasyn usynǵan. Olardyń árqaısysy – taǵdyrdyń synaǵyna túskender. Solardyń arasynan kópbalaly Zamıra Tasbolatova kópshilik daýyspen tańdalyp alynǵan. Bul otbasy osy ýaqytqa deıin tar bólmeni jaldap turyp kelgen.
Aıta ketelik, bul shara «20 jyldyq túlekterden 1 qonys» jobasy aıasynda júzege asyp otyr. Tórt jyl buryn bastaý alǵan joba aıasynda aýdanda tórt otbasyna baspana tartý etilgen.
Túrkistan oblysy
