Jaýyngerlik Dańq kitaby Qostanaıǵa qaıtyp oraldy

QOSTANAI. 25 sáýir. Qostanaı qalasy Jaýyngerlik Dańq kitabyn oblystyq ardagerler keńesine saltanatty túrde tapsyrdy. Bul týraly egemen.kz tilshisi habarlady. О́tken jyly shilde aıynda  oblysta Jaýyngerlik Dańq kitaby jasalyp, ol búkil aýdandarǵa shyǵarylǵan bolatyn. Eń  birinshi bolyp Altynsarın aýdany kitapty saltanatty túrde Qarasý aýdanyna tabys etken edi. Uly  Otan soǵysyna baılanysty aýdandaǵy tyń derekter, kózi tiri soǵys ardagerleriniń estelikteri,  maıdanda opat bolǵan  jerlester, tyldaǵy erlikke para-par eńbek týraly málimetter kitapqa jazyldy, vıdeo materıaldar túsirilip, onyń dıskisi de kitapqa japsyryldy. Kitapty kelesi aýdanǵa tapsyrý saltanatty túrde ótkizilip, jastar men  mektep oqýshylary soǵys tarıhyna, atalardyń erlik isterine qanyqty, taǵzym etti. Osy shara jyl táýligi boıy júrgizilip,  Jaýyngerlik Dańq kitaby  oblystyń búkil aýdandary men qalalaryn aralady. Endi ol Qostanaı qalasyna qaıtyp oraldy. Oblys ortalyǵyndaǵy balalar shyǵarmashylyǵy saraıynda Jaýyngerlik Dańq kitabyn oblystyq ardagerler keńesine saltanatty tapsyrý sharasyna soǵys ardagerleri, tyl eńbekkerleri, áskerı qyzmetkerler men jastar shaqyryldy. Qostanaı qalasynyń ákimi Ahmedbek Ahmetjanov: «Uly Otan soǵysyna 1,8 mıllıon qazaqstandyqtar qatysty, solardyń teń jartysy týǵan jerge oralmady. Soǵys jyldary bizdiń óńirge tutas zaýyttar men kásiporyndar kóship kelip, jumysyn jalǵastyrdy.  Herson qalasynan «Bolshevıchka» tigin fabrıkasy, Stalıngradtan  áskerı-avıasııalyq mektebi osynda keldi. Qazir alapat soǵystyń kýágerleri  aramyzdy tym azaıyp ketti, búginde Qostanaı qalasynda 122  soǵys ardageri turady» dedi. Qala ákimi soǵys ardageri Bertran Rýbınshteınge, Dmıtrıı Brýsnıkke,  Moldaǵalı Júnisbekovke, Nıkolaı Stepýrınge, Nıkolaı Barabanovqa merekelik medal tapsyrdy. Oblystyq ardagerler keńesi tóraǵasynyń orynbasary Vera Semenova: «Bul kitap ardagerler uıymdarynyń, arhıv qyzmetkerleriniń  jankeshti jumysynyń nátıjesi. Kitapta qan maıdanǵa Qostanaı oblysynan attanǵan  ár jaýyngerdiń erligi týraly aıtýǵa tyrystyq, barlyǵyn qamtyǵymyz keldi. Ondaǵy soǵys ardagerleri men  maıdan dalasynda qalǵan bozdaqtar týraly materıaldardyń barlyǵy júrekpen jazyldy, tolqymaı oqý múmkin emes. Bul kitap sonysymen de qasıetti» dedi. Jaýyngerlik Dańq kitaby jalǵyz dana bolyp jasaldy, ony kóbeıtý úshin Jeńis qorynan arnaıy qarjy bólinetin bolady. Kitaptyń oblystyq ardagerler keńesine saltanatty berilýi patrıottyq án-bımen kórkemdeldi. Názıra Járimbetova. Derek: egemen.kz Sýret: ng.kz