Bul týraly megapolıstiń aqparattyq-kommýnıkasııalyq qyzmetinde ótken brıfıngte ekonomıkalyq tergep-tekserý departamentiniń ókili K.Ismaılov málimdedi.
Sonymen qatar maman Úkimet qaýlysymen «Kóleńkeli ekonomıkaǵa qarsy is-qımyl jónindegi is-sharalardyń 2023–2025 jyldarǵa arnalǵan keshendi jospary» bekitilip, sonyń negizinde bıyl qala ákimdiginiń ókimimen kóleńkeli ekonomıka úlesin tómendetý jónindegi jumys toby, ıaǵnı komıssııanyń qurylǵanyn jetkizdi. Komıssııa jumysynyń maqsaty – Shymkent qalasyndaǵy kóleńkeli ekonomıkamen kúres, onyń deńgeıin tómendetý jáne preventıvti sharalar qabyldaý. Sondaı-aq maman departament qylmystardy ashýda sanǵa emes, sapaǵa jumys isteı bastaǵanyn, mundaǵy kózdelgen basty maqsat qoǵamnyń quqyq qorǵaý organdaryna degen senimin arttyrý men kásipkerlik sýbektileriniń qyzmetine zańsyz aralaspaý ekenin atap ótti.
Derekterge kóz júgirtsek, 2024 jyldyń 5 aıynda Shymkent qalalyq ekonomıkalyq tergep-tekserý departamenti 57 qylmystyq quqyq buzýshylyq is tirkep, onyń ishinde óndiristegi 35 qylmystyq isti tergeýdi tolyq aıaqtady, búginde 90 paıyzy sotqa joldanǵan.
Joǵaryda aıtylyp ótkendeı, kóleńkeli ekonomıkadaǵy zań buzýshylyq deńgeıin tómendetý baǵytynda qalada birqatar is-shara atqaryldy. Nátıjesinde, departament alkogol ónimderiniń zańsyz aınalymyn azaıtyp, jaqsy kórsetkishterge qol jetkizdi. Máselen, 2024 jyldyń 5 aıynda atalǵan is boıynsha qala aýmaǵynda jasyryn 5 seh anyqtalyp, Qylmystyq kodekstiń 233-babymen 5 qylmystyq is tirkeldi. Búgingi tańda 1 is óndiriste bolsa, qalǵan tórteýine aldaǵy ýaqytta sot úkim shyǵarady.
Qylmystyq ister boıynsha 22 myńnan asa daıyn alkogol ónimderi anyqtaldy. Tarqatyp aıtsaq, quramynda spırti bar 2 myń lıtrden joǵary suıyqtyq, 9 900 lıtr spırt, 885 lıtr sharap, 140 qorap qaqpaq, 4 býma esepke alý markasy, 20 býma japsyrma, 2 stanok, 4 tazalaǵysh fıltr men eki myńnan asa bos bótelke tárkilendi.
Sonymen birge bıyl aqpanda departament qyzmetkerleri júrgizgen keshendi arnaıy jedel-izdestirý is-sharalary barysynda jalǵan esepke alý, baqylaý markalaryn paıdalaný arqyly alkogol ónimderi men etıl spırtin saýdalap, satýmen aınalysqan azamattar ustaldy. Bul qylmystyq ister boıynsha tintý júrgizilip, mańyzdy aıǵaqtyq zattar tabyldy. Iаǵnı 9 900 lıtr etıl spırti, daıyn araq ónimderin jasaýǵa qajetti zattar – qaqpaq, bos bótelke, esepke alý-baqylaý markalary anyqtaldy. Budan bólek, kúdiktilerden úlken somada aqsha alynyp, ol qomaqty qarajatty paıdalanýǵa sotpen tyıym salyndy.
Sondaı-aq kúdikti tulǵalardyń qylmystyq jolmen tabylǵan aqsha qarajattaryn ári qaraı «Kaspi Bank» depozıt shotyna salyp, depozıt boıynsha ústeme paıyzdar alyp otyrǵany belgili bolǵan. Onymen qoımaı zańsyz aqshaǵa qymbat ári jap-jańa «Toyota Land Cruiser 300», «Zeekr 001», «KIA K8», «Hyundai Grandeur», «Volvo» sekildi sheteldik avtokólikterdi satyp alǵandary dáleldengen. Departament ókilderiniń málimdeýinshe, kúdiktiler qylmysyn jasyrý úshin satyp alǵan avtokólikterdi jaqyn týystarynyń atyna tirkep qoıǵan eken.
ShYMKENT
