Foto: inbusiness.kz
Atyraý oblystyq ádilet departamenti sot oryndaýshylarynyń qyzmetin retteý jáne baqylaý bóliminiń basshysy Aqbóbek Dúsipqalıevanyń aıtýynsha, alıment tóleýden jaltaratyn, tipti múldem tólemegen boryshkerler az emes. Sondaı boryshkerlerden bereshekti óndirip alý maqsatynda tıisti jumys qolǵa alynǵan. Nátıjesinde, boryshkerlerden bıyl 5 aıda 43 mln 375 myń teńge bereshek óndirilipti.
«Máselen, ótken jyldan qalǵan alıment óndirýge qatysty 9 564 qujat bar. Buǵan bıyl 1 186 atqarý qujaty qosylyp otyr. Bul qujattyń bári sot oryndaýshylaryna jiberildi. Osy kezge deıin 983 qujatty oryndaý jumysy aıaqtaldy», deıdi A.Dúsipqalıeva.
Onyń aıtýyna qaraǵanda, qazir jeke jáne memlekettik sot oryndaýshylarynyń óndirisinde 9637 qujat bar. Bul qujattyń bári alıment óndirýge qatysty.
«Balalary úshin alıment tólemegen 48 ana boryshkerler tiziminde tur. Onyń ishinde analyq quqynan aıyrylǵan, urpaǵyn balalar úıine qaldyrǵan 21 áıel bar. Al 27 áıel balalaryn kúıeýiniń tárbıesine tastap ketken. Sol sebepten qazir oblysta jalǵyzbasty 27 áke balalaryn tárbıelep otyr», dep málim etti A.Dúsipqalıeva.
Atyraý oblysy
