Mamyr aıynyń orta sheninen beri respýblıkalyq ǵaryshtyq baılanys ortalyǵynyń sep bolýymen birneshe mektepke «Starlink» júıesin ornatý jumystary bastaldy. Oblystyq aqparattandyrý, memlekettik qyzmetter kórsetý jáne arhıvter basqarmasy atalǵan ortalyqpen 145,5 mln teńge qarajatqa kelisimshart jasasqan.
«SpaceX» kompanııasynyń spýtnıktik júıesi shalǵaı jerdegi jurtshylyqtyń sapaly ınternetke qol jetkizýine aıtarlyqtaı serpin bolyp tur. Ásirese mundaı ozyq tehnologııa alysta jatqan aýyl mektepterine aýadaı qajet dúnıe. Ázirge ondaǵy mektepterge tolyqqandy provaıder ornata qoıý qıyn ekeni ras-ty. Biraq qurylyp jatqan jańa júıe mundaı kedergige qaramaı, aýyl balalarynyń sapaly bilim alýyna jol ashady. Iаǵnı kompanııa jer sharynyń kez kelgen núktesine ǵalamtor jelisin tarta alatynymen erekshe. Osy jobanyń arqasynda kóptegen shalǵaıdaǵy eldi meken joǵary jyldamdyqty ınternetke qol jetkizip, bilim berýdiń ǵana emes, medısınanyń damýyna da múmkindik alyp otyr.
– Jańa tehnologııa symsyz, ıaǵnı spýtnık júıesi arqyly ınternet taratady. Munyń múmkinshiligi zor. Qomaqty qarjy jumsalady eken degen suraq týyndaýy múmkin. Biraq kádimgi dástúrli ınternet tartylǵansha jańa júıe qyzmetin atqara turady. Qarjylandyrý máselesi oblys bıýdjetinen júzege asady, – deıdi oblystyq aqparattandyrý, memlekettik qyzmetter kórsetý jáne arhıvter basqarmasy basshysynyń orynbasary Meıirjan Jumahanov.
Qazirdiń ózinde aımaǵymyzdaǵy 106 mekteptiń 42-si «Starlink» ınternetine qosylyp úlgerdi. Qalǵan 64 mektepti shilde aıynyń sońyna deıin qosyp bitemiz deıdi jaýaptylar.
Al aı saıynǵy abonenttik tólemine keletin bolsaq, bir mektep úshin 149 774 teńgeni quraıdy. Jylyna shamamen 1 mln 800 myń teńge shyǵady. Buǵan deıin Kókpekti aýlynyń mektebi jyldam ınternetten jurdaı edi. Bul bilim oshaǵynda 487 bala bilim alady. Buǵan deıin «Qazaqtelekomnyń» sekýndyna 8 megabıttik ǵalamtor júıesin paıdalanyp kelgen. «Starlink» ornatylǵannan soń mundaǵy ınternettiń jyldamdyǵy 10 esege ósken kórinedi.
– «Starlink» júıesi bizge 25 mamyrda ornatyldy. Muǵalimder men oqýshylar rıza. Mektebimizde 4 ınformatıka kabıneti, onda 100 kompıýter bar. Burynǵy ınternetimizdiń jyldamdyǵy óte tómen edi. Barlyq kompıýterdi birden paıdalaný múmkin bolmaıtyn. Endi, mine, máselemiz ońynan sheshildi. Oqýshylarymyzdyń baǵasyn elektrondy «Bilimal» jýrnaly arqyly qoıamyz. «BilimLand», «TopIQ» syndy elektrondy qoldanbalardy da jıi paıdalanamyz. Budan bólek, Ulttyq biryńǵaı derekqor bar. Onda mekteptiń barlyq kerek málimeti júkteledi. Zamannyń damyǵan ýaǵynda kez kelgen oqýshy ınteraktıvti negizde bilim alǵysy keledi. Ásirese aýyl balalary. Sol sebepti, osyndaı ıgi iske atsalysqan barlyq quzyrly organǵa alǵysymyzdy aıtamyz. Jańa oqý jylynda jańa ınternet júıesimen oqýshylarymyzǵa sapaly bilim, sanaly tárbıe beremiz, – deıdi Kókpekti jalpy bilim berý mektebiniń dırektory Gaýhartas Jaımına.
Ozyq joba oıdaǵydaı aıaqtalsa, onda 8,5 myńǵa jýyq oqýshy jyldamdyǵy joǵary ǵalamtor jelisine qol jetkizip, bilimin tereńdete alady.
Joǵaryda aıta ótkenimizdeı, bul jańa tehnologııa eldi mekenderge talshyqty-optıkalyq baılanys jelileri tolyǵymen jetkizilgenge deıin qyzmet atqarady. «Qoljetimdi ınternet» Ulttyq jobasy aıasynda 2027 jyldyń sońyna deıin oblystyń 164 eldi mekenine talshyqty-optıkalyq baılanys jelilerin tartý kózdelgen.
Qaraǵandy oblysy
