Rásimge Joǵarǵy Sot Tóraǵasy Aslambek Merǵalıev, Sot ákimshiliginiń basshysy Naıl Ahmetzakırov, oblys ákimi Serik Shápkenov, oblystyq sottyń tóraǵasy Muhtar Parmenov jáne basqalar qatysty. Sondaı-aq olar sóılegen sózderinde memlekettiń sot bıligin damytýǵa kóńil bólip otyrǵanyn atap ótti.
4 qabatty jańa ǵımarattyń aýdany 9 myń sh.m. Onda: ákimshilik, qylmystyq, tergeý, kámeletke tolmaǵandar isteri jáne ákimshilik quqyq buzýshylyq isteri jónindegi sottar ornalasady. Ǵımaratta 17 sot zaly bar, onyń ekeýi alqabılerdiń qatysýymen ótetin prosesterge arnalyp jabdyqtalǵan. Buryn bul sottar apatty, tar jáne jaramsyz úı-jaılarda ornalasqan bolatyn.
Sot tóraǵasy A.Merǵalıev jańa ǵımarattyń sáýlettik-estetıkalyq kelbetin, onyń sot tóreligi standarttaryna sáıkestigin, zamanaýı qaýipsizdik júıesimen jáne jabdyqtarmen qamtamasyz etilgenin, bul proseske qatysýshylarǵa qolaıly jaǵdaı týǵyzatynyn tilge tıek etti.
Al S.Shápkenov jańa sot ǵımaratynyń ashylýyn óńirdegi oqıǵa dep atap ótip, sottardaǵy tıimdi ózgerister zańdy jáne ádil sot sheshimderiniń qabyldanýyna yqpal etetinine toqtaldy.
Oblystyq sottyń tóraǵasy M.Parmenov oblys sýdıalarynyń sot tóreligin sapaly júzege asyrýǵa bar kúsh-jigerin salatynyna senim bildirdi.
Oblystyq bıler keńesiniń tóraǵasy Ahmyrza Batyrhaıyrov quttyqtaý sóz sóıledi.
Rásimge qatysýshylar májilis zalyn, sot zaldaryn, sýdıalar kabınetin jáne basqa da úı-jaılardy aralap kórdi.
Sonymen qatar Joǵarǵy Sot Tóraǵasy men Sot ákimshiliginiń basshysy oblystyq sot korpýsymen kezdesti. Kezdesý barysynda oblystyq sot alqalarynyń tóraǵalary Tátti Ýálıeva, Máten Erǵazıev jáne Anargúl Salıhova, sondaı-aq oblystyq sottyń tóraǵasy Muhtar Parmenov óz jumystary baıandady.
Joǵarǵy Sot Tóraǵasy sybaılas jemqorlyqqa qarsy qabyldanyp jatqan sharalarǵa, azamattarǵa iltıpatpen qaraýǵa, memlekettik qyzmetshilerdiń ádepti saqtaýyna toqtalyp, sot júıesiniń basym baǵyttary týraly málimdedi.
«Qoǵam bizden ádil jáne beıtarap sot tóreligin kútedi. Sottarda adamdar aqıqat pen qorǵan taba alatyn ádilet saraıyna kirgenin tabaldyryqtan sezinýi kerek», dedi ol.
Rásim sońynda A.Merǵalıev oblystyq sottyń otstavkadaǵy sýdıalary Gúlnár Qarabalına men Ádil Quspanovty «Minsiz qyzmeti úshin» medalimen marapattady.
Qyrmyzy JUMAǴALIQYZY,
EUÝ stýdenti
