Foto: Parlament Senatynyń baspasóz qyzmeti
Kezdesý barysynda kolledj bazasynda kreatıvti ındýstrııa ortalyǵyn qurý, jastardyń bastamalaryn qoldaý, bilim berý úderisterine sıfrlyq sıpat engizý, onyń ishinde jasandy ıntellekt quraldaryn qoldaný máselesi talqylandy.
Nurtóre Júsip memleket júrgizip jatqan reformalar týraly aıta kelip, ol bilim berý deńgeıiniń sapasyn arttyrýǵa, pedagogter men bilim berý mekemeleri qyzmetkerleriniń áleýmettik kepildigin jaqsartýǵa, sondaı-aq olardyń róli men mártebesin arttyrýǵa baǵyttalǵanyna toqtaldy.
«Prezıdent Qasym-Jomart Toqaev óz Joldaýynda bilim jáne ǵylym máselesine erekshe nazar aýdarǵan bolatyn. Memleket basshysy bilim berý júıesi eńbek naryǵynyń qajetine oraı, zárý mamandar tizimin eskere otyryp ózgerýi tıis ekenin atap ótti. Ulttyq ekonomıkanyń kóptegen salalarynda, ásirese tehnıkalyq jáne jumysshy mamandyǵyna kadr jetispeıdi. Sondyqtan kerek bolatyn mamandyq boıynsha bilim berý isimen maqsatty túrde aınalysý qajet. Oqý oryndary áleýetti jumys berýshilermen uzaq merzimdi seriktestik qarym-qatynas ornatýy tıis. Senatorlar Prezıdent aıtqan barlyq mindetter men maqsattar tez ózgeretin álem jaǵdaıynda jáne óskeleń urpaqqa jaıly bolashaq qalyptastyrýǵa qajet dep sanaıdy. Árıne, bul úlken eńbekti qajet etedi. Alaıda, Memleket basshysynyń tapsyrmalaryn sapaly ári ýaqtyly oryndaý bárimizge ortaq mindet», dedi Nurtóre Júsip.
Sonymen qatar depýtat óskeleń urpaqtyń oqyrmandyq saýatyn arttyrýdyń mańyzy men kitaphanalardyń kitap qorlaryn qyzyqty kitaptarmen tolyqtyrý qajettigin atap ótti. Ol sondaı-aq ulttyq quryltaıdyń úshinshi otyrysynda Memleket basshysy kitap oqýdyń mańyzdylyǵyna erekshe nazar aýdarǵanyn tilge tıek etti. Nurtóre Júsip osyǵan oraı óz kolleksııasyndaǵy súıikti 100 kitabyn kolledjdiń kitap qoryna tapsyryp, olardyń oqyrmandaryna paıdaly ári qyzyqty bolatynyna úmit bildirdi.
Qyrmyzy JUMAǴALIQYZY,
EUÝ stýdenti
