Foto: ernur.kz
AQSh-tyń Kenedı aeroportynda Djon Smıt esimdi kisi, kezikken adamǵa «Dúnıedegi eń jaman nárse ne?» degen suraq qoıady. Kenet bir monahtyń aldyna kelip:
– Dúnıedegi eń jaman nárse ne? – deıdi suraǵyn qaıtalap.
Sonda monah:
– Sen kimsiń? – deıdi.
– Men – Djon Smıtpin!
Ol jaı ǵana esimiń ǵoı, sen kimsiń? – deıdi.
– Men jýrnalıspin! – deıdi Djon.
– Ol seniń atqaratyn qyzmetiń ǵoı, sen kimsiń?
– Adammyn!
– Bul seniń bıologııalyq ataýyń ǵoı, sen kimsiń?
Djon únsiz qalady.
– Mine, dúnıedegi eń jaman nárse – ózińniń kim ekenińdi bilmeý, – deıdi monah.
Iá, barlyq esti adamnyń aldynan kese-kóldeneń turatyn suraq – osy suraq. Býdda dara jol izdeýshilerge: «Taýqymetten, dármensizdikten, kárilik pen ólimnen qutylmaıtynyńdy túsine turyp, ómir súrýge bolmaıdy; ózińdi ómirden, ómirdiń kez kelgen múmkindiginen azat etýiń kerek» dep baǵyt nusqaıdy. Al Solomon kúıreýiktikke salynyp: «О́mirdeginiń bári aqymaqtyq ta, danalyq ta, baılyq pen kedeılik te, qýanysh pen qaıǵy da – bári-bári áýreshilik pen bekershilik» dep short kesedi.
Bázbireýler ózgelerdiń pikirine súıenip, ómir mánin dolbarlap jatady. Jo-joq. Mán tabý degenimiz – basqaǵa súıene salý emes, kerisinshe, barsha adamzat eńbegi arqyly jalǵyzdyqta jańasha hám ózińshe izdenip shyndyqty tabý. Adamnyń ish tereńdigi men aqyl aýqymynyń eshkimge uqsamaıtynyn eskersek, ár adamnyń aqıqatty tabý joly eshkimge uqsamaq emes.
Belgili ózbek aqyny Muhammed Salyq bir suhbatynda: «Men ne úshin ómirge kelgenimdi jáne ne úshin óletinimdi anyq bilemin. Bul ózim úshin úlken baqyt. Kez kelgen shyǵarmashylyq osy tylsymdy bilýge qyzmet etkende ǵana mán men mazmunǵa ıe bolady» degen bolatyn. Shynynda, Blez Paskal aıtqandaı, «biz munda qandaı bıiktikten qulaǵanymyzdy bilý úshin» kelgenimiz anyq.
