Foto: Almas Maratulynyń jeke muraǵatynan
Rasyn aıtqanda, jaǵajaılardaǵy servıs qymbat. Oǵan qosa ınfraqurylymy da maqtanarlyqtaı emes. Kásipkerlerdi de túsinýge bolady. Qysqa merzimde barynsha tabys taýyp qalǵysy keledi. О́ıtkeni demalys oryndary 8-9 aı boıy bos turady ǵoı.
Osyndaıda bizdiń elge saparlaýdy kózdegen týrısterge ne usyna alamyz degen suraq týady. Biz eldegi klımattyq jaǵdaıdy eskere otyryp, sheteldik týrısterge ekotýrızmdi usyna alatymyzdy aıtamyz. Ol úshin taý-tas, orman-kólimiz bar. Bári keremet, ásem, ári tabıǵı qalpyn áli buza qoımaǵan. Bizdiń «Boz jyry» dep atalatyn eksklıýzıvti týr baǵdarlarymyz bar. Bilseńizder, Qatonqaraǵaı ulttyq tabıǵı parki 640 myńǵa jýyq sharshy shaqyrymdy alyp jatyr. Sol jerde ekotýrızmniń úlken bir oshaǵyn jasaýǵa bolady. Osynyń bárin negizge alyp, elde ekotýrızmdi damytý kerek degen tańdaý jasadyq. Endi osy baǵytta jumys isteımiz.
Eldegi qyzmet kórsetý sapasyna týrısterdiń kóńili tola ma, degen saýalǵa toqtalaıyn. О́zimizdiń ishki týrızmmen saıahattaıtyn azamattarǵa qyzmet qymbatqa túsken soń, kóńili tola bermeıdi. Munyń túpki sebebi halyqtyń ál-aýqatyna qatysty der edim. Negizi elde týrısterge kórsetiletin qyzmet aqysy qymbat emes. Jaz aılarynda kópshilik eńbek demalysyna shyǵady. Sodan suranys kúrt artyp, baǵa kóteriledi. Sóıtip, quny Túrkııa, Mysyr elderiniń baǵasymen ıyqtasyp ketedi. Baǵany naryq retteıdi degen osy. Mysaly, Shymbulaqqa barǵan sheteldik týrıster saparǵa dán rıza bolady. Onda shańǵy teýip, jan raqatyn tabamyn degen adamǵa kerektiń bári bar. Qonaqúıler men meıramhanalar da ozyq úlgide qyzmet kórsetedi. Qyzyǵy, sheteldikter úshin bizdegi baǵa salystyrmaly túrde arzan. Sebebi Eýropa men Reseıdegi keıbir deńgeıles demalys oryndary Shymbulaqtan áldeqaıda qymbat. Saladaǵy basty másele – organdardaǵy salaaralyq qatynastyń joqtyǵy. Týrızm salasy bir mekemege ǵana baılanyp turǵan joq qoı. Týrıst shekaradan ótkende shekara qyzmetine, keıin kólikke júginedi. Odan ári ulttyq parkke barǵanda mekeme qonaqtardy jaıly qarsy alyp, shyn yqylas-nıetpen shyǵaryp salýǵa tıis. Memleket basshysy kúshtik qurylymdardan bastap, týrızmge qatysy bar barlyq mekeme basshylaryn jıyp, naqty tapsyrma júktep otyr. О́ıtkeni Týrızm jáne sport mınıstrliginde tıisti barlyq organǵa áser ete alatyn kúsh joq. Prezıdenttiń oryndy tapsyrmalary ornyqty oryndalsa, el týrızmi ońalady degen úmittemiz.
Almas Maratuly,
«Limon Travel» týrıstik kompanııasynyń dırektory
