Jyr alyby Jambyl bolsa: «Batyrym – Málik, berenim, Júırigim – ozǵan órenim. Halqy súıgen qalaýlym, Jyrymdy saǵan tógemin», dep jyrlaıdy.
Aldaǵy jyly týǵanyna 110 jyl tolatyn Málik aǵamyz haqynda buǵan deıin talaı jazyldy. Batyrdyń surapyl soǵystaǵy erligi týraly alǵash ret keńestik belgili jazýshy Borıs Polevoı 1943 jylǵy 25 sáýirde «Pravda» gazetinde «Eldiń eri» degen taqyryppen kólemdi maqala jarııalap, jalpyǵa áıgiledi.
M.Ǵabdýllın maǵan naǵashy aǵaıym bolyp keledi. Ol Jeltaý taýynyń Zerendi jaǵynda ornalasqan Qoısalǵan aýlynan bolsa, biz ekinshi jaǵynda oryn tepken Qulet aýlynan edik. Málik aǵaıym óz aýlynda mektep bolmaǵandyqtan, bizdiń aýyldaǵy tórt jyldyq mektepte saýat ashyp, bastaýyshty sonda bitiripti.
Negizgi aıtpaǵym, batyrdyń 110 jyldyǵyna oraı birneshe bólimnen turatyn kórkemsýretti fılm túsirilse degen usynys edi. Men osydan onshaqty jyl buryn osy máseleni kóterip, Mádenıet jáne aqparat mınıstrligine hat jazǵanmyn. Biraq ondaǵylar sol kezde Baýyrjan Momyshuly, Qasym Qaısenov týraly fılmder túsirilgenin, qazir ondaı kıno túsirýge qarjylaı múmkindik joq ekenin kóldeneń tartqan bolatyn.
Bolashaq urpaqty patrıottyq rýhta tárbıeleý, aǵa urpaqtyń erlik isterin keńinen nasıhattaý úshin batyrlarymyz týraly fılmder kerek-aq der edik.
Serik NAÝQANBAIULY,
eńbek ardageri
KО́KShETAÝ
Eńbekqordyń erteńi eńseli
Ákemniń arqasynda kóptegen parasat bıigindegi adamdarmen tanystym. Mysaly, shejireli Tómengi Baryshan jerinde Jámıla Bojbambaeva, Aleksandr Nahmanovıch, Orynkúl Atabaeva, Elena Svınkovskaıa, Darıha Jantoqova syndy elimizdiń birqatar Eńbek erleri ósip shyqty. Olardyń jasampaz isterin búginde aýyldastary jalǵastyryp otyr. A.Nahmanovıchtiń traktorshydan elge tanymal ujymshar tóraǵalyǵyna deıin kóterilgenin aıta ketkenniń artyqtyǵy joq.
Talas pen Qostóbe aýyldary buryn qandaı bolsa, qazir de sol deńgeıde. Aınalasy baý-baqshaǵa oranǵan. Qostóbe aýyldyq okrýginiń ákimi Nurǵalı Qojabergenov, óndiristik kooperatıv dırektory Zakır Mýmınov qyzmetterin alýan menshikti aýyl ekonomıkasynyń mańyzdy bóligi bolyp tabylatyn sharýa qojalyqtaryn, jeke kásiporyndardy, shaǵyn jáne orta bıznesti damytýǵa baǵyttaı júrgizedi. Qaırat Týǵanbaev pen Salamat Rahmanberdıevtiń kenttik bolysý qaǵıdatymen jumys isteıtin jekemenshik kásipornynyń dańqy aýdannan tys jerlerge de taraǵan. Olar jumystaryn aýyl sharýashylyǵy ónimderin jergilikti jerde óńdep, uqsatý, kásiporynnyń qalamen óndiristik ıntegrasııasyn qalyptastyrý, turǵyndardyń bir bóligin jumysqa tartý múmkindigin keńeıtý baǵyttarynda júrgizip keledi jáne ol óz jemisin berip otyr.
Qaırat Mámbetovtiń shujyq, Sergeı Lesnıaktyń sút ónimderi sehy, al Zakır Mýmınovtiń ósimdik maıyn shyǵaratyn jeke kásiporny óńirge jaqsy tanylyp qaldy deýge bolady. Jalpy, aýyl sharýashylyǵy ónimderin óndirýmen kópultty aýyl turǵyndarynyń 1 250 jeke aýla sharýashylyǵy aınalysady. Keıingi jyldary dándi daqyldar, et, sút óndirý kólemi artqan.
Aýyl ekonomıkasynyń negizgi salmaǵyn turǵyndardyń jeke aýyl sharýashylyǵy kóterip turǵanyn da atap kórsetken jón. Qala bazarlaryn irimshik, sary maı, shujyq ónimderimen qamtamasyz etýde olardyń úlesi úlken. Sharýa qojalyqtarynda dándi jáne mal azyǵy daqyldarynyń 65 paıyzy ósiriledi. Eger eń basty problemalar: sý resýrstaryn tıimdi paıdalaný, ırrıgasııalyq júıelerdi retteý, jerdi melıorasııalaý, jaıylymdardy sýlandyrý, tabıǵı gazben jabdyqtaýdy qalpyna keltirý sııaqty máseleler oń sheshilse, onda aýyl ekonomıkasy qazirgiden de jaqsara túser edi.
Ǵaını KО́ShEKBAEVA,
psıholog
Jambyl oblysy,
Baızaq aýdany
Belsendi qyzmetker belesi
Densaýlyq saqtaý mınıstrligi beldi qyzmetkeri Jumaǵyz Jarasova – maqtan tutar áriptesimiz. О́zi óte qarapaıym da kishipeıil, sonymen birge, bilikti farmasevtıka isin uıymdastyrýshy kásibı maman.
Jumaǵyz Ǵalymjanqyzy Astana qalasynyń dárihanalyq jáne medısınalyq densaýlyq saqtaý mekemeleriniń memlekettik júıesin damytýǵa eleýli úles qosyp keledi. О́ziniń kóp jylǵy adal eńbegi, joǵary iskerlik, adamı qasıeti úshin áriptesteri oǵan árkez úlken qurmetpen qaraıdy. Osy qyzmette istegen jyldary osy salada júrgen ondaǵan jas mamanǵa oń baǵyt siltep, ózin bilikti tálimger retinde de kórsete bildi.
J.Jarasova «Aqniet» Densaýlyq saqtaý qyzmetkerleri bastaýysh kásipodaq uıymynyń múshesi retinde departamenttiń qoǵamdyq ómirine de belsene qatysady. Atap aıtqanda, túrli sporttyq jáne mádenı-buqaralyq is-sharalar uıymdastyrady. Departament qyzmetkerleriniń áleýmettik jáne quqyqtyq saýatyn arttyrýǵa baǵyttalǵan ujymdyq shartyn ázirleýge úlken úles qosty. Ujymdaǵy kásipodaq músheleriniń múddelerin qorǵaýda da árkez aldyńǵy qatardan tabylady.
Belsendi eńbegi eleýsiz qalmaı, komıtet pen departamentti bylaı qoıǵanda, salalyq mınıstrlik tarapynan da birqatar marapatqa ıe bolyp júr. Máselen, byltyr Medısına qyzmetkerleri kúnine oraı Astana qalasyndaǵy Qazaqstan salalyq densaýlyq saqtaý qyzmetkerleri kásipodaǵy fılıalynyń Qurmet gramotasymen marapattaldy. Áriptesimizdiń budan basqa da kóptegen gramotasy men alǵystary bar.
Maıra BAZYLBEKOVA,
Medısınalyq jáne farmasevtıkalyq baqylaý komıtetiniń Astana qalasy boıynsha
departamentiniń zańgeri
ASTANA
