Sýretterde Qytaı derekterindegi kóshpelilerdiń «kúzgi qomyrǵan» ańshylyq dástúrin beınelengen
Bul tusta dalanyń qońyr ańy eýrazııalyq keńistikte jyrtylyp-aıyrylyp jatqan. Osylardy aýlaý barysynda áýeli mergen sadaqshylar soǵys mashyǵyn jetildiretin bolsa, ekinshi taraptan joǵaryda aıtqanymyzdaı, joryq asyn daıyndaǵan.
Mysaly, Altyn Orda bıleýshileri kúzgi qomyrǵandy qalaı uıymdastyrǵany týraly 1253–1255 jyldary qazaq dalasyn kókteı ótip, Shyǵysqa sapar shekken Eýropa saıahatshysy Gılom de Rýbrýktiń kúndelik jazbasynda aıtylsa, ıtalııalyq jıhankez Marko Polo: «Uly hannyń (Qubylaıdy aıtady) Baıan jáne Mıngan atty aǵaıyndy bekteri bar. Olar hannyń qol astyndaǵy 20 myń ańshyny basqarady. Mıngan basqarǵan 10 myń adam qyzyl tústi kıim kıip, Baıan bastaǵan 10 myń adam kók tústi kıim kıip, hanmen birge ań aýlaýǵa (qomyrǵanǵa) shyǵady. Ekige bólingen ańshy-qusshylar kúnshilik jerden sheńber jasap, ań-qustardy qyspaqqa túsiredi. Dál osy sátti kórý keremet tamasha áser beredi», dep jazypty.
Qomyrǵan kezinde kóshpeliler joǵaryda aıtqanymyzdaı, joryq asyn daıyndaıtyn bolsa, ekinshi taraptan ań ańlaý barysynda sadaqshylar qosyny qońyr ańdardy atyp, mergendik ónerin shyńdap, jaýyngerlik mashyǵyn jetildiretin bolǵan eken. Bul týraly 2006 jyly jaryq kórgen «Babalar sózi» kóptomdyǵynyń 56-tomy 241-betinde:
«Qýyp atyp kıikti,
Tútinge tútin qosqannan.
Úsh atqansha, bir atyp,
Bolǵansha qımyl, qulatyp,
Jol jaǵalaı shubatyp,
Qyryna alsa, qyryq atyp,
Qyp júrgen isi ilgeri,
Qataǵan tánti elderi», –
dep jyrlanǵan eken.
