Qarapaıym qazaq mektebiniń túlegi álemniń 40 ýnıversıtetine shaqyrtý aldy. Onyń ishinde Amerıka, Birikken Arab Ámirlikteri, Ońtústik-Shyǵys Azııa JOO-lary bar. Ol Malaızııada oqýdy tańdady.
- Maǵan kásiptik baǵdar berý boıynsha proforıentologtar men muǵalimder kómektesti. Men 100 nemese odan da kóp ýnıversıtetke qujat tapsyrdym. Olardyń 40-na shaqyrtý aldym. Men Malaızııada shamamen 4-5 jyl oqımyn. Odan keıin Qazaqstanǵa baryp, kásibimdi damytýdy josparlap otyrmyn, – dedi túlek Sýnaýlla Oktamov.
17 jastaǵy Alekseı Kımdi de birden álemniń 8 úzdik ýnıversıteti shaqyrǵan. Ol halyqaralyq jáne respýblıkalyq olımpıadalardy jeńgen, bolashaǵyn IT tehnologııalarmen baılanystyryp otyr.
- 11-synyptyń basynda Nıý-Iork-te oqımyn dep oıladym, sebebi ol arman qala. Sonda qujat tapsyramyn dep sheshtim. Qazir kórip otyrǵanyńyzdaı, bári oıdaǵydaı boldy. Men grant jeńip aldym, – dedi M.H.Dýlatı atyndaǵy №8 mamandandyrylǵan gımnazııasynyń oqýshysy Alekseı Kım.
