Jıynda oblys ákimi Nurlybek Nálibaev óńirde turǵyndardyń medısınalyq qyzmetke qoljetimdiligin arttyrý, densaýlyq saqtaý ınfraqurylymyn odan ári jetildirý júıeli júrgizilip kele jatqanyn atap ótti. Osydan 2 jyl buryn 45 jedel járdem kóligi alynyp, oblystyq medısınalyq jedel járdem stansasy 100 paıyz qamtamasyz etilgen bolatyn.
«О́tken jyly salaǵa 513 mln teńgege 25 jańa sanıtarlyq avtokólik tabystalsa, bıyl barlyq eldi mekendegi densaýlyq saqtaý mekemelerine 200 sanıtarlyq avtokólik alynady. Sonyń alǵashqy legin búgin tabystasaq, qalǵan 150-i jyl sońyna deıin beriledi. Osylaısha, bıyl eldi mekenderdi sanıtarlyq avtokólikpen qamtý máselesin túbegeıli sheshemiz», dedi Nurlybek Mashbekuly.
El saýlyǵyn saqtaýǵa eńbek etip júrgen áriptesterin kásibı merekemen Densaýlyq saqtaý birinshi vıse-mınıstri Tımýr Sultanǵazıev, A.N.Syzǵanov atyndaǵy hırýrgııa ǵylymı ortalyǵynyń basqarma tóraǵasy Bolatbek Baımahanov quttyqtap, sala ardageri Turǵanbaı Mahanov bata berdi.
Bıyl óńirdiń medısına salasynda aýqymdy jobalar bar. Memleket basshysynyń bastamasymen qolǵa alynǵan «Aýylda densaýlyq saqtaýdy jańǵyrtý» ulttyq jobasy aıasynda jalpy quny 11 mlrd teńge bolatyn 27 nysan salý kózdelgen. О́tken jyly eldi mekenderde 15 jańa dárigerlik ambýlatorııa, 1 medısınalyq beket paıdalanýǵa berildi. Qalǵan 11 nysan jyl sońyna deıin halyq ıgiligine tabystalady.
«Aýyl – el besigi» baǵdarlamasy sheńberinde Qyzylorda qalasynyń Dosan eldi mekeninde medısınalyq beket, Baımurat batyr aýylynda dárigerlik ambýlatorııa qoldanysqa berilip, kópti qýantty. Kópbeıindi oblystyq aýrýhanada jańa MRT apparaty iske qosylyp, 70 oryndyq perınataldyq bólim ashyldy. Oblys ortalyǵynda 36 mlrd 400 mln teńgege bir aýysymda 100 kelýshige arnalǵan emhanasy men onkologııalyq bólimshesi bar 300 oryndyq kópbeıindi aýrýhananyń qurylysy júrip jatyr.
Osy kezge deıin Qan ortalyǵynyń jeke ǵımaraty bolmaǵan edi. Qurylysyna respýblıkalyq bıýdjetten 2 mlrd 900 mln teńge bólinip, qalanyń sol jaǵalaýynan salynyp jatqan ortalyq ǵımaraty jaqyn kúnderi el ıgiligine beriledi. Jergilikti bıýdjet esebinen 922 mln teńgege Jańaqorǵan aýdany, Tómenaryq aýylynda dárigerlik ambýlatorııasymen qosa 15 tósektik aýyldyq aýrýhana salynyp jatyr. Shıeli aýdanynda da 30 tósektik ınfeksııalyq bólimshe qurylysy bastalady.
Aımaq medısınasyn damytýǵa bıýdjetten tys qoldaý aıasy da artyp otyr. «Qazaqstan halqyna» qoǵamdyq qory eki jylda óńirdiń densaýlyq saqtaý salasyna 2 mlrd teńgeden astam qarjy baǵyttapty. Bul qarjyǵa oblystyq balalar aýrýhanasy bazasynda «Qamqorlyq» reabılıtasııa ortalyǵy ashylyp, asa qymbat dári-dármek alyndy. Qor oblystyq onkologııa ortalyǵyn 1 mlrd 100 mln teńge turatyn onkologııalyq skrınıng júrgizýge arnalǵan jyljymaly medısınalyq keshenmen qamtamasyz etti. Mamandar qazir respýblıkanyń 3 óńirinde ǵana kezdesetin keshenniń birimen oblystyń shalǵaı eldi mekenderin aralap, 1 300-den astam turǵyn onkolog keńesin aldy.
Halyqqa sapaly medısınalyq qyzmet kórsetý úshin mamandar biliktiligin arttyrý da mańyzdy ekeni belgili. Osy baǵyttaǵy jumystar jalǵasyn taýyp, bıyl 10 reanımatolog jáne 5 kardıolog maman Túrkııada jetekshi medısınalyq uıym sanalatyn «Memorıal» klınıkasynda bilim jetildirip keldi. 2018 jyldan búgingi kúnge deıin suranysqa ıe mamandyqtar boıynsha 155 rezıdentke, 162 jalpy tájirıbelik dárigerdi daıarlaýǵa oblys ákiminiń arnaıy granty bólinip, 2023 jyly 590 dáriger, 738 orta býyndy medısına qyzmetkerleri biliktiligin arttyrypty. Bıyl Syr dárigerleriniń elimizdegi aldyńǵy qatarly medısına ortalyqtarymen qatar, shet elderde de biliktiligin arttyrý kózdelip otyr.
Jyl kóleminde hırýrgııalyq sala boıynsha 14 sheberlik saǵaty ótkizilip, 21 túrli operasııa jańadan engizildi. Araǵa 9 jyl salyp búırek transplantasııasy operasııasy jasaldy.
Qyzylorda
