Dóńgelek ústeldi júrgizgen KazNARU basqarma tóraǵasy-rektor, Ulttyq ǵylym akademııasynyń prezıdenti Aqylbek Kúrishbaev respýblıkadaǵy sý qoryn saqtaýdyń mańyzyn atap óte kelip, «Sý resýrstary jáne sýdy paıdalaný» kafedrasynda uzaq jyldar abyroıly eńbek etken ǵalymnyń sý sharýashylyǵy salasyn damytýdaǵy eren eńbegine toqtaldy. Mereıtoıymen quttyqtap, syı-sııapat kórsetti.
«Narıman Qypshaqbaıulynyń elimizdiń sý sharýashylyǵyn damytýǵa qosqan zor úlesin únemi yqylaspen aıtyp júremiz. О́ıtkeni qaıratker eńbek jolyn qarapaıym maman bolyp bastap, Melıorasııa jáne sý sharýashylyǵy mınıstrliginiń basshylyǵyna deıingi nátıjeli jumystary áli kúnge deıin aýyl sharýashylyǵynyń damýyna paıdasyn tıgizip otyr. Táýelsizdik jyldarynda Sý kodeksiniń jobasyn ázirleýge jetekshilik etip, Ortalyq Azııa memleketteri, Reseı jáne Qytaı arasyndaǵy transshekaralyq ózenderdiń sýyn paıdalaný jónindegi halyqaralyq uıymdy qurýǵa úlken úles qosty. Sonymen qatar Halyqaralyq Araldy qutqarý qoryn qurýǵa belsendilikpen atsalysyp, sý qaýipsizdigin saqtaý, sý nysandaryn qorǵaý máselelerinde barlyq áriptesine úlgi kórsetip keledi. Toqsannyń tórine shyqqan Narıman Qypshaqbaıulyn barsha ǵalym áriptesteriniń atynan zor densaýlyq, qajyrly kúsh-qaırat tileımiz!», dedi rektor.
«Jer men sý – Qazaqstannyń eń úlken baılyǵy. Sondyqtan tabıǵat baılyǵyn kózdiń qarashyǵyndaı saqtaýǵa tıispiz. Meniń sý salasynyń ınjenerligin tańdaýym da jaıdan-jaı emes. Halqymyzdyń jaqsy ómir súrýin qamtamasyz ete otyryp, osy tabıǵattyń bergen syıyn resýrsqa tıimdi aınaldyra otyryp, kózdiń qarashyǵyndaı saqtaýǵa mindetti ekenimizdi este ustaýymyz qajet», dedi Narıman Qypshaqbaıuly.
Dóńgelek ústel barysynda «Water HUB» halyqaralyq zertteý ortalyǵynyń dırektory A.Rıabsev, Geografııa ınstıtýtynyń dırektory A.Medeý, Ý.Ahmetsafın atyndaǵy Gıdrogeologııa ınstıtýtynyń dırektory M.Ábsemetov, Halyqaralyq Araldy qutqarý qorynyń Qazaqstandaǵy Atqarýshy dıreksııasynyń dırektory S.Muqataev, D.Qonaev atyndaǵy ÚAK fılıalynyń dırektory M.Arystanov, «Kazgıprovodhoz» PK dırektory R.Faızýldın jáne taǵy da basqa azamattar ǵalymdy mereıtoıymen quttyqtap, elimizdegi sý salasynda týyndap otyrǵan ózekti máseleler men olardy sheshý joldaryn talqylady.
ALMATY
