Orys tarıhshysy hám jazýshy Aleksandr Shabalov «Ob etnıcheskoı prınadlejnostı hýnný» atty monografııasynda: «Ejelgi ǵundar altyn, kúmis, qola buıymdardy paıdalanyp, qoldanbaly qolóner týyndylarynyń keremet damyta bildi jáne ol buıymdardy túrlendirip, áshekeıleý arqyly adamzat tarıhyna zor tóńkeris ákeldi» dep jazady.
Rasynda, Aleksandr Sokratovıch aıtqandaı, ǵundardan qalǵan qundy muranyń biri – ózderińiz kórip otyrǵan myna bir qola qazan. Bul jádigerdiń salmaǵy – 4,720 kılo, bıiktigi – 33,7 sm, aýyz jaǵynyń dıametri – 25,5 sm, túbiniń kólemi – 14,8 sm, tutqasynyń bıiktigi – 4,5 sm. Qazan b.z.b. IV ǵasyrda kóne túriktiń uıyq mekeni О́týken qoınaýynda jasalypty.
Pishini rombık tektes, aýyz jaǵy keń de, túp jaǵyna qaraı jińishkere túsken. Qos tutasy tutas quıylyp jasalǵan, eki jaǵynda shaǵyn sańlaý tesigi bar. Syrtyna tórt jerden aı bederli tańba salynǵan. Bul qazan qazir Mońǵolııanyń ońtústigi ataqty Gobı shóliniń bel ortasynda ornalasqan О́mnegob aımaǵynyń ortalyǵy Dalanzadgad qalasyndaǵy ortalyq mýzeıde tur. Atalǵan mekeme artefaktileriniń moldyǵy jáne tarıhı kezeńderge qatysty jádigerlerdiń mańyzdylyǵy jaǵynan el astanasyndaǵy Shyńǵys qaǵan mýzeıinen keıingi ekinshi orynda eken.
Mamandardyń aıtýyna qaraǵanda qola qazan birneshe jyl buryn Baıan-oba sumyn ólkesindegi «Shyǵys shı» atty qonystan tabylypty. Qazirgi tańda zerttep, zerdeleý jumysy júrip jatyr. Aıaqtalǵan soń ǵylymı aınalymǵa jiberilmek kórinedi.
