Foto: opennews.kz
Ulttyq joba aıasynda jalpy sany 655 alǵashqy medısınalyq-sanıtarlyq kómek berý nysanyn salý kózdelgen bolatyn. Byltyrdan beri júzege asyp kele jatqan baǵdarlama aıasynda 95 nysan paıdalanýǵa berilgen. Joba aıasynda atqarylyp jatqan sharalar týraly densaýlyq saqtaý vıse-mınıstri Jandos Búrkitbaev baıandady. Onyń sózinshe, búginde 483 nysan boıynsha jobalyq-smetalyq qujat daıyn. 355-ine qatysty tıisti qarjy bólindi.
«Qazirde óńirlerde qurylys jumystary júrip jatyr. Sonymen qatar biz qalǵan nysandarǵa qatysty jobalyq qujattardy bekitý, avtorlyq, tehnıkalyq baqylaý boıynsha kelisimsharttardy jasaý úrdisin de baqylap otyrmyz», dedi Jandos Búrkitbaev.
Ulttyq joba aýyldaǵy aǵaıynnyń medısınalyq kómekke qoljetimdiligin arttyrýdy kózdeıdi. Onyń azamattar úshin mańyzy asa joǵary ekenin atap ótken vıse-premer birqatar tapsyrma berdi.
«Qurylysy júrýge tıis nysandardyń qatary kóp ekenin eskersek, bul másele turaqty ári jan-jaqty qadaǵalaýdy qajet etedi. Jumystardyń sapasyna basa mán berilýge tıis. Jobanyń halyq úshin áleýmettik mańyzy zor, sáıkesinshe artylar jaýapkershilik te joǵary. Sol sebepti barlyq múddeli memlekettik organ, oblys ákimdigi jumyla otyryp, baqylaýdy kúsheıtýi qajet», dep atap ótti Tamara Dúısenova.
Aıta keteıik, jobanyń júzege asý barysyna qatysty esep vıse-premer deńgeıinde apta saıyn qarastyrylyp otyrmaq.
