Foto: turkystan.kz
Dáýlet Káribek Qazaqstan Prezıdentiniń halyqaralyq saıasattaǵy baıypty bastamalarynyń mańyzyn jáne onyń óńirlik qaýipsizdikti nyǵaıtýǵa qosqan úlesin atap ótti.
«Qasym-Jomart Toqaev qazirgi tańda jahandyq qaýipsizdikti, turaqtylyq pen ornyqty damýdy qamtamasyz etý mindeti «orta derjavalarǵa» júktelgenin aıtty. Dıplomatııa men áriptestik qaǵıdalaryna súıene otyryp, orta derjavalar adamzattyń aldynda turǵan jahandyq syn-qaterlerge qarsy birge shyǵýǵa tıis. Memleket basshymyzdyń pikirinshe, ashyqtyq pen jahandanýǵa umtylý, dıplomatııa men dıalog aýmaqtyq daý-damaılardan bastap ıdeologııalyq janjaldarǵa deıin túrli kelispeýshilikti eńserýdiń basty quraldaryna aınalýǵa tıis», dedi ol.
«Amanat»-tyń Atqarýshy hatshysy bıyl Qazaqstannyń Túrki memleketteri uıymyna tóraǵalyǵy «Turktime!» uranymen ótetinine nazar aýdardy. Sondaı-aq Dáýlet Káribek óńirlik jáne jahandyq qaýipsizdikti qamtamasyz etý úshin Túrki memleketteri uıymyn nyǵaıtýdyń mańyzyna toqtaldy.
«Geosaıası qubylmalylyq, saýda jáne sanksııalyq soǵystar, jahandyq jetkizý tizbekteriniń buzylýy damý paradıgmasynyń aýysqanyn dáleldeıdi. Osyndaı jaǵdaıda Túrki memleketteri uıymynyń róli arta túsken. Álemdegi geosaıası jaǵdaı shıelenisken kezde Uıym halyqaralyq saıasattyń utymdy jáne pragmatıkalyq júrgizilýin, logıstıkalyq, kóliktik, dıplomatııalyq jáne t.b. kommýnıkasııalardy qamtamasyz etetin tetikterdiń biri bolyp qalýda. Osylaısha, Uıym turaqsyzdyqty eńserý men shyǵyndardy barynsha azaıtý úshin kópir bolyp qyzmet etedi», dedi ol.
Halyqaralyq konferensııaǵa 300-ge jýyq meıman qatysty. Olardyń arasynda Túrki memleketteri uıymyna múshe elder men baqylaýshy elderdegi kóshbasshy partııalardyń jetekshileri boldy. Shýshada uıymdastyrylǵan Konferensııa túrki memleketteriniń qazirgi geosaıası shyndyqtary men strategııalyq maqsattaryn talqylaýdyń mańyzdy alańyna aınaldy. Is-shara uıymǵa múshe memleketterdiń halyqaralyq arenadaǵy pozısııalaryn nyǵaıtýǵa jáne tıimdi yntymaqtasýǵa múmkindik beredi.
