Palata birinshi oqylymda sot júıesin reformalaý jáne prosestik zańnamany jetildirý máseleleri boıynsha zańnamalyq túzetýlerdi talqylaıdy. Tıisti zań jobasyn Parlament depýtattary Memleket basshysynyń tapsyrmalaryn oryndaý maqsatymen ázirledi. Jańa redaksııaǵa sáıkes Joǵarǵy sottyń róli ózgerip, onyń negizgi maqsaty sot tájirıbesin naqtylaý jáne birkelki qamtamasyz etý bolady. Sot tóreligin tek jergilikti jáne kassasııalyq sottar ǵana júzege asyrady. Osyǵan baılanysty Qylmystyq-prosestik, Azamattyq-prosestik jáne Ákimshilik rásimdik-prosestik kodeksterine ózgerister engiziledi.
Sondaı-aq erekshe qorǵalatyn tabıǵı aýmaqtardy paıdalanǵany úshin tólem alý tártibin jetildirý týraly zań jobasy men Salyq kodeksine engiziletin ilespe túzetýlerdi birinshi oqylymda qaraý usynylady.
Kún tártibinde Birikken Ulttar Uıymy men Qazaqstan arasyndaǵy sıfrlyq ınklıýzııa jáne transformasııa jónindegi Azııa-Tynyq muhıty mınıstrleriniń konferensııasyn uıymdastyrý týraly kelisimdi ratıfıkasııalaý týraly zań jobasy da bar.
Budan bólek, Májilis komıtetteri Qazaqstan-Qatar arasyndaǵy áskerı yntymaqtastyǵy týraly kelisimdi ratıfıkasııalaý jobasy, gazben jabdyqtaý jáne taýarlyq gazdy únemdi tutynýǵa qatysty zań jobalaryn jumysqa alady.
