Sýretti túsirgen – M. Aıaǵanov
Aqqýly aýdanyna qaraıtyn Tilektes aýlyndaǵy mekteptiń ábden kónerip turǵany týraly másele keıingi eki jylda bıik minberlerden jıi aıtyla bastaǵan. Ǵımarat qamystan salynǵan, esik-terezesinen, qabyrǵa jaryqtarynan jel gýlep, qysta ishi salqyndap ketedi. 2022 jyly oǵan memlekettik tehnıkalyq saraptama taǵaıyndalyp, nysanǵa kúrdeli jóndeý júrgizý qajet degen tujyrym jasaldy. Sóıtip, bıyl bıýdjetten 150 mln teńge qarajat bólinip, ony jóndeýge konkýrs jarııalandy. Balalarynyń sýyq ári tozǵan ǵımaratta oqyp jatqanyna qashanǵy tóze bersin, jergilikti ata-analar bul sheshimmen kelispeı bas kóterdi. Mekteptiń qamystan salynǵanyn, ony jóndeý emes, ornynan syryp tastap, zamanǵa saı jańasyn salýdy talap etti. Tipti bolmaǵan soń, jergilikti belsendi azamattar men qoǵamdyq uıymdardyń qolǵa alýymen táýelsiz saraptama uıymdastyrmaq boldy. Abyroı bolǵanda, óńirlik bilim basqarmasy aýyl mektebine qaıtadan saraptama júrgizip, nátıjesinde shyn máninde ǵımarattyń apattyq jaǵdaıda turǵany belgili boldy.
Aqqýly aýdanynyń belsendi turǵyny, kásipker Rýslan Mýsın jergilikti shendiler jańa mektep salýǵa asyqpaı otyrǵanyn synǵa aldy. Aıtýynsha, ol salynǵanǵa deıin Tilektes aýlynyń balalaryn jaqyn jerdegi Qyzylqoǵam aýlyna tasýǵa týra keledi. О́tken jyly oblystyń birneshe aýdanynda qysqa merzimde jańa mektepter turǵyzyldy. Sondaı qaýyrt tirlikpen jumys istese, kúzge deıin Tilekteste jańa bilim uıasyn ashyp tastaýǵa ábden bolar edi dep esepteıdi ol.
Tilektes orta mektebiniń dırektory Aınur Bekbaýovanyń sózinshe, ǵımarattyń tóbesinen sý sorǵalap, keıbir jerlerinde tóbesi otyra bastaǵan.
«Qabyrǵasynyń jarylǵan jerlerin únemi sementpen bitep, aǵartyp otyramyz. Bul mektepti kezinde ózim de aıaqtaǵanmyn. Pedagogter men sharýashylyq qyzmetkerleriniń arqasynda osy ýaqytqa deıin múmkindiginshe ustap keldik. Balalar qalypty jaǵdaıda oqýy úshin ǵımarattardaǵy keıbir kemshilikterdi jasyrýǵa týra keldi. Barlyq sanıtarlyq normalardy saqtap otyrdyq. Alaıda mektepte sportzal men májilis zaly joq. Sondyqtan qystyń kúnderi deneshynyqtyrý sabaqtarynda balalar arqalaryn jazyp oınaı almaıdy. Mektebimiz memlekettik tilde bilim beredi. Qazirgi ýaqytta 51 bala bilim alyp jatsa, aldaǵy ýaqytta aýlymyzǵa elimizdiń ońtústiginen kóptegen otbasy kóship keledi degen jospar tur. Iаǵnı keleshekte oqýshy sany ulǵaıa túsedi», deıdi ol.
О́ńirlik bilim basqarmasynyń basshysy Samal Aıtqazına atalǵan mektep qurylysy boıynsha qazirgi ýaqytta jobalyq-smetalyq qujattar ázirlenip jatqanyn, alaıda mektepti kúzge deıin salyp bitirý oıǵa syımaıtynyn málimdedi.
«Osydan 1,5 jyl buryn bizdiń basqarmanyń tapsyrysymen Tilektes aýly mektebiniń jaǵdaıyn bilý úshin tehnıkalyq saraptama júrgizildi. Tap sol ýaqyttaǵy saraptama nátıjesi mektep ǵımaratyn apattyq jaǵdaıda turǵan joq dep kórsetti. Iаǵnı biz ony apattyq jaǵdaıda turǵan bilim uıalarynyń tizimine qosqan joqpyz. Esterińizde bolsa, byltyr óńirimizde 3 mekteptiń apattyq jaǵdaıda turǵany anyqtalǵan. Oblys basshylyǵynyń sheshimimen olardyń ornyna jańadan bilim ǵımarattary turǵyzyldy. Atap aıtqanda, Jelezın aýdanyndaǵy Moıseevka, Pavlodar aýdanyndaǵy Sychevka, Baıanaýyldaǵy Qarajar mektepteri. Eger osydan bir jarym jyl buryn Tilektestegi oqý ǵımaratynyń apattyq jaǵdaıda turǵany belgili bolsa, byltyr ol jerge de jańa mektep salynǵan bolar edi. Al Tilektes mektebiniń ata-analary bul máseleni jýyqta ǵana kóterdi. Soǵan oraı biz bıylǵy kóktemde mektepke qaıtadan tehnıkalyq saraptama júrgizýge tapsyrys berdik. Onyń nátıjesinde qamystan salynǵan nysannyń shyn máninde apattyq jaǵdaıda turǵany málim boldy. Endi biz soǵan saı áreket jasap jatyrmyz. Iаǵnı mektepti apatty dep tanyp, ornyna jańa ǵımarat turǵyzýǵa kiristik. Qurylys basqarmasy qazirgi sátte jobalyq-smetalyq qujattardy daıyndatqyzý ústinde. Ol daıyn bolysymen qurylysqa kirisedi», dep jaýap berdi basqarma basshysy.
Jańa mektep 50 balaǵa shaqtalyp salynady. Onda 13 oqý kabıneti, sport zaly, eki kıim aýystyratyn oryn, 40 oqýshyǵa shaqtalǵan ashana, tehnologııa kabıneti, májilis zaly, 20 bala tárbıelenetin shaǵyn ortalyq bolady. Sondaı-aq jobada shaǵyn fýtbol men basketbol alańdary, balalarǵa arnalǵan oıyn alańy qarastyrylǵan. Mektep salynyp bitkenshe jańa oqý jyly jeti shaqyrym jerdegi Qyzylqoǵam aýlynda uıymdastyrylady. Aýdan bıligi qazirgi ýaqytta bilim basqarmasyna avtobýs bólý týraly ótinim jibergen.
Jaqynda Aqqýly aýdanyna arnaıy barǵan Pavlodar oblysynyń ákimi Asaıyn Baıhanov 50 oryndyq mektep salý qarjylyq turǵydan tıimdirek ekenin jáne oqýshylar eki aýysymmen bilim ala alatynyn jetkizdi.
«Úlken mektepti ustap turýdyń shyǵyny kóp bolady. Jyl saıyn elektr qýaty, jaǵatyn kómiri bar. Tipti eden jýýdyń ózi sharshy metrmen esepteletini málim. Mysaly, 50 bala oqıtyn 100 oryndyq mekteptiń kútimine jylyna 100 mıllıon teńge bóletin bolsaq, 50 bala oqıtyn bilim uıasyna 50 mıllıon teńge qarastyrylady. Sondyqtan túptep kelgende bul joba tıimdi», dedi óńir basshysy.
Áıtse de, Tilektes aýlynyń turǵyndary mektepti 100 oryndyq etip salyp berýdi surap otyr. Jaqyn ýaqytta ońtústikten otbasylar kóship kele bastaıdy. Sol kezde mektepti keńeıtý máselesi aldan shyǵýy múmkin. Qazirdiń ózinde munda 51 bala bar, al qyrkúıekte birinshi synypqa bes bala barady dep kútiledi. Sondyqtan kóptiń bul buıymtaıy ábden zańdy dep oılaımyz. Qazirgi ýaqytta Tilektes aýlynda 256 adam turyp jatyr.
Pavlodar oblysy,
Aqqýly aýdany,
Tilektes aýly
