Semınarǵa 200-den asa ádisker, mektep kitaphanashylary, ǵylymı-pedagogıkalyq kitaphananyń qyzmetkerleri, sondaı-aq aqyn-jazýshylar men oblystyq bilim basqarmasynyń ókilderi qatysty. Astana, Almaty, Shymkent qalalarynan jáne Qaraǵandy oblysynan kelgen ádiskerler men mektep kitaphanashylary ózderiniń jumys tásilderin kórsetip, qyzyqty kvest-oıyndar ótkizdi. Sondaı-aq Abaı óleńderin jatqa oqyp, belgili shyǵarmalar jelisi boıynsha tapsyrmalar oryndady.
«Búginde árbir adamnyń basty mindeti – saýatty urpaq tárbıeleý. Biz kitap oqý daǵdysyn balalarymyzǵa sińirýimiz kerek. Muny balabaqshadan bastaý kerek», deıdi Respýblıkalyq ǵylymı-ádistemelik kitaphananyń bas ádiskeri Amangúl Eshimova.
Al Abaı, Almaty, Atyraý, Jambyl, Túrkistan oblystarynyń ádiskerleri «Aty ańyzǵa aınalǵan Jasybaı kóliniń jaǵasynda kitap oqý» seksııasynda óz jumys tásilderin ortaǵa saldy. «Aqbet taýynyń bókterindegi Toraıǵyr kóliniń jaǵasynda kitap oqý» seksııasynda Batys Qazaqstan oblysy, Shyǵys Qazaqstan oblysy, Jetisý, Ulytaý, Qyzylorda, Pavlodar oblystarynan kelgen ádiskerler men kitaphanashylar kitaphana jumysynda jańa tehnologııalardy qoldaný ádisterin kórsetti.
Semınardy qorytyndylaý kezinde ár óńirden kelgen úzdik kitaphanashylar toby kórsetken jumysynyń baǵasy berilip, dıplomdarmen marapattaldy, al qatysýshylarǵa sertıfıkattar tabystaldy.
