Zaısan kóli men Qara Ertis ózeniniń ekojúıesi úshin mańyzy zor sharaǵa Shyǵysqa jumys saparymen kelgen ekologııa mınıstri Erlan Nysanbaev ta qatysty. Balyqtandyrý jumysyn oblysymyzdaǵy bekire balyǵynyń ýyldyryǵyn jáne etin óndirýmen aınalysatyn irgeli kásiporyndardyń biri, biregeıi «Ost Fish» JShS qolǵa alǵan.
Atalǵan kásiporynnyń bas dırektory Erlan Saǵıdoldın Qara Ertis ózenine balyq jiberý sharasyna atsalysqan azamattarǵa bekire tuqymdasty ósirýdiń erekshelikteri, olardy qorǵaý, jergilikti ekojúıeni saqtaý jóninde tarqatyp aıtyp berdi.
– Bizdiń kásiporyn bekireniń úsh túrin ósiredi. Onyń ishinde Sibir bekiresi de bar. Bıyl kóktemde sharýashylyǵymyzda tehnologııany jańartý jumystary júrgizilgen. Sonyń nátıjesinde jylyna 500 myńǵa jýyq shabaq alýǵa bolatyndaı ınfraqurylym quryldy. Endi shabaqtarymyzdy Abaı, Pavlodar jáne Shyǵys Qazaqstan oblystarynyń sý aıdyndaryna jiberýdi josparlap otyrmyz, – dedi kásiporyn basshysy E.Saǵıdoldın.
Onyń aıtýynsha, búgin Marqakól men Zaısan aýdandaryn bólip jatqan Qara Ertis ózenine Sibir bekiresiniń bir jasar 500 daraǵy jiberildi. Balyqtardyń árqaısysynyń salmaǵy 1,5 kelige deıin tartady. Demek olarǵa bul sýlardy meken etetin jyrtqysh balyqtardan keler qaýip joq.
Kóppen birge Sibir bekiresiniń tarıhı mekenine oralýyna kýá bolǵan Ekologııa mınıstri Erlan Nysanbaev: «Bul – óte quptarlyq bastama. Sebebi Sibir bekiresi Zaısan men Ertisti ejelden mekendegen. Alaıda ótken ǵasyrdyń 50-60-jyldaryndaǵy sý elektr stansalarynyń salynýy ádette Sibir men Altaı arasynda órlep-quldap júretin balyqtardyń joǵary óristeýine tosqaýyl bolǵan. Endi, mine, bul problema da sheshimin tapqan sekildi.
Sibir bekiresin Zaısan basseınine, Qara Ertiske jersindirýdi kózdep, bul baǵytta batyl áreket etken azamattarǵa eńbekterine tek sáttilik tileımin. Mınıstrlik tarapynan bul bastamaǵa ún qosyp, qoldaý bildirýge daıynbyz. Bul baǵyttaǵy jumystar aldaǵy ýaqytta jalǵasyn tabady», dedi.
Sonymen qatar sala basshysy qazir balyq ósiremin degen sharýashylyqtarǵa memleket tarapynan jan-jaqty qoldaý bolatynyn aıtyp sendirdi.
Shyǵys Qazaqstan oblysy
