О́tken jyldyń sońynda Eurasian Resources Group (ERG) quramyndaǵy «Eýroazıattyq energetıkalyq korporasııasy» AQ Aqsý elektr stansııasy mamandarynyń turǵyn úı jaǵdaılaryn jaqsartýǵa baǵyttalǵan jeńildetilgen baǵdarlama qolǵa alynǵan edi. Oǵan qatysqan qyzmetkerlerge Otbasy bank jyldyq 5% ústememen (JTSM mólsheri 5,2%-dan bastap 5,3%-ǵa deıin) zaım beredi. Qaryz alýshylardan talap etiletin bastapqy jarna mejesi – bar bolǵany - 10%. Bul Pavlodar oblysy ákiminiń orynbasary Dáýren Jambaıbek, Otbasy bank Pavlodar oblystyq fılıalynyń dırektory Talǵat Baılov jáne Qazaqstandaǵy ERG-diń Bas dırektorynyń qarjy jónindegi orynbasary Danııar Rahmatýllaevtyń ózara túsinistik pen áriptestik týraly úshjaqty memorandýmǵa qol qoıýynyń nátıjesinde júzege asty. Oǵan sáıkes baǵdarlamany iske asyrý úshin ár tarap 300 mln teńgeden bóletin bolyp ýaǵdalasty. Nátıjesinde baǵdarlamanyń ıpotekalyq qarjy qory 900 mln teńgeni quraıdy. Otbasy banktiń sharttaryna súıene otyryp, ár páterdiń quny shamamen 17 mln teńge dep eseptesek, bul qarajat 52 otbasynyń jeńildikpen páter satyp alýyna jetkilikti. Jalpy mundaı ıpotekalyq joba ERG-diń ózge de kásiporyndary ornalasqan Aqtóbe men Qaraǵandy oblystarynda da sátti iske asyrylyp jatqan kórinedi. Al Pavlodar oblysynda bıyl alǵash ret qolǵa alynǵaly otyr.
«Eýroazıattyq energetıkalyq korporasııasy» AQ-nyń áleýmettik máseleler jónindegi basshysy Aıdos Adaı atap ótkendeı, úmitkerlerdi irikteý barysynda aksıonerlik qoǵamda arnaıy qurylǵan turǵyn úı komıssııasy ákimdiktiń kezegine turǵan mamandarǵa basymdyq beredi. Qyzmetkerler satyp alatyn páterdiń Aqsý qalasynda jańa nemese ekinshi naryqtan bolaryn ózderi tańdaıdy.
«Búgin Aqsý elektr stansııasynda ótip jatqan «Armanǵa jol» forýmyna qatysqanyma qýanyshtymyn. Sebebi, biz óz qyzmetkerlerimizdiń jaıly jaǵdaıda jumys istep qana qoımaı, jaıly baspanada turýyn qalaımyz. Forýmǵa qatysqan 200-den astam qyzmetker ózderi úshin paıdaly aqparat aldy dep oılaımyn. Is-sharaǵa «ERG Service» JShS-niń de ókilderi qatysty. Azamattardyń keıbiri jańadan úı alǵysy kelse, endi biri turyp jatqan úıin keńeıtkisi keledi. Al taǵy biri balalarynyń keleshegin oılap, depozıt ashýdy armandaıdy. Balalarymyzdyń jarqyn bolashaǵyna negizdelgen «Aqyl» depozıti, sondaı-a «Ulttyq qor - balalarǵa» jobasy jaıynda da bank ókilderi óte paıdaly maǵlumattar berdi. Ásirese, qyzmetkerler Otbasy bankte 18 aı boıy depozıtke qarajat jınap, 20 paıyz alǵashqy jarnany quıýmen ekinshi naryqtan páter satyp alýǵa bolatyn múmkindik bizdiń kompanııa mamandaryn qýantqany baıqalady. Qarapaıym jumys adamdary kóbine mundaı baǵdarlamalardy bilmeı jatady. Sondyqtan Otbasy bank ókilderi arnaıy kelip, qyzmetkerlerimizge barlyǵyn túsindirip berip jatqany óte úlken artyqshylyq dep oılaımyn. Bul forým - ERG kompanııasy jáne Otbasy banktiń birlesýimen uıymdastyrylyp otyrǵan joba. Bizdiń kásiporynda 2 myńǵa jýyq adam eńbek etedi. Aldaǵy ýaqytta uıymda turǵyn úı kezegine muqtaj jandardyń áleýmettik jaǵdaıy men kezegin anyqtaıtyn arnaıy avtomatty júıe qurylady. Sol arqyly qyzmetkerlerimizdiń qanshasy baspanaǵa zárý ekenin bilip otyratyn bolamyz. Qyzmetker halyqqa qyzmet kórsetý ortalyǵynda qujattaryn tıisti úrde rásimdep kelgen soń, álgi júıege tirkeledi. Arnaıy komıssııa olardy irikteýden ótkizip, úmitkerlerdi tańdaıtyn bolady. Eger páter satyp alýdy qalaıtyn azamattarymyzdyń sany kóbeıetin bolsa bolashaqta baǵdarlamany qarjylandyrý kólemin ulǵaıtyp, joba ári qaraı jalǵasa beredi», dep áńgimeledi Aıdos Adaı.
Sońǵy bes jylda Otbasy banktiń baǵdarlamalaryn qoldaný nátıjesinde ERG kompanııasynda eńbek etetin 600-den astam adam baspanaly bolǵan. Jalpy alǵanda 2009 jyldan beri ERG qyzmetkerleriniń qataryndaǵy 2 myń otbasy turǵyn úımen qamtylǵan.
«Otbasy bank ERG kompanııasymen 5 jyldan astam ýaqyt boıy áriptestik baılanysta jumys istep kelemiz. Áýel basta arendalyq-jınaqtyq tetikpen páterlerdi berý júıesin birlese engizdik. Atalǵan kompanııa óz betimen baspanalar salyp, olardy jas mamandarǵa, baǵaly kadrlaryna jalǵa usyndy. Bul azamattar aı saıyn páterdi jaldaý aqysynan bólek, baspanany tolyqtaı óz menshigine satyp alý úshin arnaıy shotqa qarajat jınady. Arada úsh jyl ótkende ózderi jınap kelgen qarajatty alǵashqy jarna retinde salyp, bizdiń bank jyldyq syıaqy ústemesi nebári 5 paıyzben (JTSM 5,2%-dan bastap 5,3%-ǵa deıin) ıpotekalyq nesıe usyndy. Kompanııa barlyq qyzmetkerlerine turǵyn úı salyp berýge úlgermeıtinin baıqaǵan soń ózge de nesıelik baǵdarlamalarymyzǵa qatysýǵa nıet tanytty. Osylaısha ERG-diń Aqtóbe, Pavlodar, Qostanaı oblystaryndaǵy kásiporyndarynda eńbek etetin qyzmetkerler úshin alǵashqy jarnasy 10 paıyz, jyldyq mólsherlemesi 5 paıyzben (JTSM 5,2%-dan bastap 5,3%-ǵa deıin) nesıe usynýdy bastadyq», deıdi forýmǵa arnaıy kelip qatysqan «Otbasy bank» AQ Basqarma tóraǵasynyń orynbasary Nurlan Aqshanov.
Forýmda Otbasy banktiń ókilderi «Naýryz», «Otaý», «Ulttyq qor - balalarǵa» baǵdarlamalary men «Aqyl» depozıti týraly keńirek aqparat usyndy. Qarjy uıymynan ıpotekalyq qaryz alyp, baspanaly bolǵan azamattardyń mysaldary keltirildi. Máselen Tereńkól aýdanynda uzaq jyl turyp, keıin Aqsý qalasynan 12 mln teńgege baspana satyp alǵan zeınetkerdiń tájirıbesi aıtyldy. 57 jasar áıel adam Otbasy bankten depozıt ashyp, 6 jyl boıy alǵashqy jarna jınaǵan. Nátıjesinde 63 jasqa kelgende banktiń kómegimen Aqsýdan jaıly páter satyp alǵan. Otbasy bank arqyly armandaǵan baspanaǵa qol jetkizgenderdiń qatarynda ERG kompanııasyna jańadan ornalasqan jas mamandar da barshylyq. Solardyń biri – Abylaıhan Dıýsekov.
«Ata-anam mektepte oqyp júrgen shaǵymda Otbasy bankinen depozıt ashyp, meniń atyma aqsha jınap júrdi. Sonyń arqasynda jaqynda ıpotekaǵa 2 bólmeli páter aldym. Jasym 23-te. Otbasy bankiniń usynyp otyrǵan barlyq múmkindikteri úshin alǵys aıtqym keledi», deıdi jas maman.
Al Aqsý elektr stansııasyndaǵy ýchaske basshysy Dáýlet Saǵandyqov 2018 jyly bankte depozıt ashyp, arada 3 jyl ótkende ańsaǵan páterin satyp alǵanyn baıandady. Aıtýynsha, ata-anasy zeınetaqy qoryndaǵy shekti mólsherden asqan somany qosyp, úıdi jyldam satyp alýǵa septigin tıgizgen.
«Otbasy bank arqyly páter satyp alýdy armandap júrmin. Sebebi nesıe sharttary biz sııaqty eńbek adamdary úshin tıimdi. Buryn jańa baspana alý úshin bankte 50 paıyz jarnasyn jınaýǵa týra keletin. Al qazir halyqqa tıimdi jańa baǵdarlamalar bar ekenin bilip jatyrmyz. Ásirese, «Naýryz» baǵdarlamasy arqyly 20 paıyzdyq alǵashqy jarnany quısań, kez kelgen qaladan qalaǵan páterińdi satyp alýǵa bolady eken. О́zge bireýdiń páterin jaldap turǵansha, óz páteriń úshin tólegen áldeqaıda jaqsyraq. Depozıtim jınalyp tur, endi páter tańdaýdamyn», dep óz pikirin bólisti forým sońynan Aqsý elektr stansııasyndaǵy sorǵy stansııasynyń jóndeý jónindegi ınjeneri Danııar Toqsanbaev.
Basynda úıi bar adamnyń erteńge degen senimi artyp, otbasynda turaqtylyq pen bereke bolatyny málim. Endeshe Otbasy bank pen ERG usynyp otyrǵan jańa joba aldaǵy ýaqytta júzdegen januıaǵa baspana qýanyshyn syılaıdy degen oıdamyz.
Pavlodar oblysy
Aqsý qalasy
