Foto: QR Qorǵanys mınıstrligi
Prezıdent Qasym-Jomart Toqaev 99250 áskerı bóliminiń komandıri polkovnık Rasýl Zákirovke II dárejeli «Aıbyn» ordenin tabys etti. Onyń basshylyǵymen Batys Qazaqstan oblysynyń aýmaqtyq qorǵanys brıgadasy eldi mekenderdi aman alyp qalýǵa atsalysty. Táýlik boıy atqarylyp jatqan jumystar uıymdastyrýdy jáne jeke quramnyń qaýipsizdigin qamtamasyz etýdi talap etti.
Qarýly kúshterdiń ushý quramy da apatty jaǵdaıda zor eńbek etti. Áýe qorǵanysy kúshteri áskerı ınstıtýty bastyǵynyń orynbasary polkovnık Amangeldi Maqyshevtyń basshylyǵymen Mı-8 tikushaǵynyń ekıpajy Batys Qazaqstan oblysynda jergilikti halyqty izdeýmen, qutqarýmen jáne olardy evakýasııalaýmen aınalysty.
Osyndaı sharalarǵa Astana qalasyndaǵy 19132 jyly áskerı bólimi jaýyngerlik daıarlyq bólimi ushýdy basqarý tobynyń bastyǵy podpolkovnık Mırshat Saǵyndyqov jáne Áýe qorǵanysy kúshteri áskerı ınstıtýty kýrsanttar batalonynyń komandıri podpolkovnık Ashat Shafıev ta qatysty.
Sýdan ótkel jasaýdy uıymdastyrý barysynda Qonaev qalasyndaǵy 58012 áskerı bóliminiń ponton-kópir batalony vzvodynyń komandıri 3-synypty serjant Zahıdjan Karımov ta eńbegimen kózge tústi.
Batys Qazaqstan oblysynda jaǵalaýdy kúsheıtý jumystaryn júrgizý kezinde 18404 áskerı bólimi desanttyq-shabýyldaý batalonynyń jaýyngerlik jáne dene daıyndyǵy jónindegi nusqaýshysy 3-synypty serjant Amangeldi Bazarbaev qajyrly qyzmet etti.
Memleket basshysy Aqordada olardyń janqııarlyq eńbegin elep, «Jaýyngerlik erligi úshin» medalimen marapattady.
Toǵyz áskerı qyzmetshige memlekettik nagradalar saltanatty túrde qyzmet ornynda tabys etiletin bolady. II dárejeli «Aıbyn» ordenine Áskerı-áýe kúshteri qolbasshysynyń basqarmasy jaýyngerlik daıarlyq basqarmasynyń aǵa ınspektor – ushqyshy polkovnık Qaırat Túgelov laıyq dep tanyldy.
Áýe qorǵanysy kúshteri áskerı ınstıtýty oqý avıasııalyq ortalyǵy eskadrılıasynyń býyn komandıri jáne komandırdiń orynbasary maıorlar Jánibek Bekbaýlıev pen Bıbarys Ybyraev, 19132 áskerı bólimi avıasııalyq eskadrılıasynyń shtýrmany maıor Ashat Seıilov, «Batys» óńirlik qolbasshylyǵy áskerleri qolbasshysy basqarmasynyń shtaby ınjenerlik áskerler bóliminiń aǵa ofıseri podpolkovnık Tımýr Zákirov, 30238 áskerı bólimi komandıriniń orynbasary podpolkovnık Sáken Shuǵanov, 35748 áskerı bólimi rota komandıriniń orynbasary aǵa leıtenant Jasulan Biribaev, 31775 áskerı bóliminiń aǵa mamany efreıtor Asan Tileýbaı, Áskerı-áýe kúshteri qolbasshysynyń basqarmasy jaýyngerlik daıarlyq basqarmasynyń aǵa ınspektor – ushqyshy polkovnık Vladımır Semenov «Jaýyngerlik erligi úshin» medalimen marapattaldy.
Eske salaıyq, Qarýly kúshterdiń áskerı qyzmetshileri Aqtóbe, Atyraý, Batys Qazaqstan, Aqmola, Qostanaı, Soltústik Qazaqstan, Qaraǵandy, Shyǵys Qazaqstan oblystaryna jáne Abaı oblystaryndaǵy qarǵyn sýdy joıýǵa jumyldyrylǵan edi. Eki aıdyń ishinde olardyń kúsh-quraldarymen ózenderdiń jaǵalaýlary kúsheıtilip, 183 shaqyrym bógetter nyǵaıtyldy, shamamen 3,5 mln qap qum toltyrylyp, jalpy aýdany 766 ga obektilerge dezınfeksııa júrgizildi, armııalyq avıasııa tikushaqtarynyń ekıpajdary 3,5 myńnan asa azamatty evakýasııalady, al ushaq ekıpajdary 280 tonnaǵa jýyq júk jetkizdi.
