Foto: QR IIM Ulttyq ulanynyń baspasóz qyzmeti
Elordalyq quramnyń jaýyngerleri qala tynyshtyǵyn kúzetý boıynsha qyzmetke túsý úshin saltanatty sap túzep turdy. Áskerı bólim komandıri marapattaý úshin áskerı jasaqty minber aldyna shaqyrdy. Sarbazdar úshtigi áskerı júrispen minberdiń aldyna kelip, sapqa turdy. Alǵashqy bolyp «Aq jol» partııasynyń ókilderi sarbazdardy marapattady. Eki sarbazǵa maqtaý qaǵazyn usynsa, qatardaǵy Álisher Mahmettiń keýdesine medal taqty. Olardyń aıtýynsha, Álisherdeı jastar elimizdiń bolashaǵy bolyp tabylady.
Sodan keıin, Astana qalasynyń Tótenshe jaǵdaılar Departamenti bastyǵynyń orynbasary azamattyq qorǵanys podpolkovnıgi Madııar Myrzageldınov QR Tótenshe jaǵdaılar mınıstriniń buıryǵyn oqyp, ulandyq Álisher Mahmetke vedomstvolyq medaldi tabys etti.
«Ulttyq ulan sarbazy Álisherge oqıǵa ornynda erlik tanytyp, adam ómirin qutqarǵany úshin alǵys bildiremiz», dedi mınıstrlik ofıseri saptyq alańdaǵy jeke quramǵa qarap.
Sarbazdyń ózi bolsa, bul onyń Otan aldyndaǵy mindeti ekeni, jáne quramanyń barlyq sarbazdary onyń ornynda bolsa, osylaı jasaıtynyn aıtty.
«Men úshin búgingi marapattardyń orny erekshe. Erligimdi eskergeni úshin Ulttyq ulan Bas qolbasshysyna, áskerı bólim komandırine jáne QR Tótenshe jaǵdaılar mınıstirligi men partııa ókilderine alǵys aıtamyn. Bizdiń mindetimiz - tynyshtyqty qorǵaý, elge kómektesý», dedi jas sarbaz.
Qatardaǵy Álisher Mahmet Soltústik Qazaqstan oblysynyń týmasy, ótken jyldyń qarasha aıynda 5573 áskerı bólimine Otan aldyndaǵy boryshyn óteý úshin kelgen.
Eske sala keteıik, 15 maýsym kúni keshki ýaqytta Astana qalasynda 5573 áskerı bóliminiń qatardaǵy jaýyngerleri Álisher Mahmet, Arsen Qazı men Rınat Dosshanov qyzmet atqarý kezinde Aqbulaq ózeninen júzip ótýge dosymen básekelesip, sýǵa bata jazdaǵan №63 mektep oqýshysyn qutqarǵan edi.
