Baıqaýda qutqarýshylar, polıseıler, órt sóndirýshiler, akýsherler, jedel járdem qyzmetkerleri jáne taý-ken óndirisi mamandary baq synaı alady. Jeńimpazdar «Janqııarlyq», «Altyn júrek», «О́nerkásip», «Bolashaq týraly qamqorlyq», «Adamgershilik», «Kómek qoly», «Bizdiń úı» atalymy aıasynda anyqtalady.
– «Jas Kenes Syilygy» – bul táýelsiz syılyq. Jobanyń basqa baıqaýlardan aıyrmashylyǵy – basshylar men top-menedjerler qatysa almaıdy. Jobanyń maqsatty – aýdıtorııasy tek 35 jasqa deıingi mamandar. Syılyq qoǵam úshin mańyzdy ekonomıkalyq salalarda jumys isteıtin jas otandastarymyzdy kótermeleý, qoldaý, yntalandyrý maqsatynda beriledi. Baıqaýdyń júlde qory – 14 mln teńge. Ár jeńimpazǵa 1 mln teńgeden bólinedi, – deıdi Prezıdent janyndaǵy Jastar saıasaty jónindegi keńestiń múshesi Ádil Qusmanov.
Joba Mádenıet jáne aqparat mınıstrliginiń qoldaýymen júzege asyrylyp jatyr. Ol úshin irikteý úsh kezeńnen turady. Alǵashqy satyda ótinimder qabyldanyp, jiti tekseriledi. Ekinshi kezeńde kandıdattardyń túıindemeleri men motıvasııalyq esseleri saralanady. Keıin syılyqtyń quryltaıshylarymen suhbat bolady. Nátıjesinde, ár atalym boıynsha eki jeńimpaz tańdalady.
Jastar saıasaty jónindegi keńestiń bastamasymen qurylǵan táýelsiz jastar syılyǵynda baq synaý úshin ár otandasymyz ótinimderin 21 shildege deıin Jaskenes.kz/application saıtynda qaldyra alady.
