Foto: Astana ákimdigi
Jıynda komıssııa músheleri otbasylyq qundylyqtardy dáripteýge jáne otbasy ınstıtýtyn arttyrýǵa baǵyttalǵan ulttyq baıqaýǵa baq synaýǵa ótinim bergen otbasylardyń ishinen úzdigin tańdaý úshin qujattarmen tanysyp, beınerolıkterdi qarady.
Komıssııa músheleri úzdik otbasylardy tańdaý kezinde olardyń árqaısysynyń jetken jetistikterine, otbasylyq dástúrleri men ulttyq qundylyqtarǵa mán berdi.
Odan bólek, otbasy músheleriniń qabileti men daryny da nazardan tys qalmady. Bos ýaqytyn tıimdi ótkizý, salaýatty ómir saltyn ustaný, volonterlik, qaıyrymdylyq isteri de tańdaý kezinde eskerildi.
«Komıssııanyń árbir múshesi otbasylardy baldyq júıe boıynsha baǵalaıdy. Baldardyń jalpy sany teń bolǵan jaǵdaıda túpkilikti sheshim ashyq daýys berý arqyly qabyldanady. Keıin komıssııa sheshiminiń negizinde jeńimpaz otbasylarǵa «Mereıli otbasy» ulttyq konkýrsynyń laýreaty ataǵy beriledi», dedi Astana qalasy ákimdigi Ishki saıasat basqarmasynyń úkimettik emes sektormen jumys bóliminiń basshysy Aıdana Qamzaeva.
Bıyl 238 otbasy konkýrsqa qatysý úshin qujattar tapsyrdy. Eńbek pen sportta, shyǵarmashylyq jáne zııatkerlik salalarda, ǵylym men ónerde jetistikteri bar otbasylar, sondaı-aq qoǵamdyq paıdaly qyzmetke belsendi aralasatyn otbasylar, kópbalaly otbasylar, erekshe balalary bar otbasylar, ardagerler, eńbek adamdary jáne shyǵarmashyl áýletter qatysyp otyr.
Komıssııa otyrysynan soń qalalyq kezeńniń jeńimpazdary belgili bolady. Úzdik dep tanylǵan otbasy respýblıkalyq kezeńge joldama alady. Al qalalyq kezeńniń saltanatty marapattaý rásimi Astana kúni qarsańynda ótkiziledi.
Aıta keteıik, «Mereıli otbasy» ulttyq baıqaýy Qazaqstanda 2013 jyldan bastap jyl saıyn ótkizilip keledi.
