Foto: 365info.kz
«Monıtorıng júıesiniń otandyq óndirýshilerdi, memlekettik satyp alýdaǵy otandyq úlesti qoldaýǵa yqpal etýi óte mańyzdy. Prezıdentimiz memlekettik satyp alýlardaǵy elishilik qundylyǵymyzdyń úlesin 60 paıyzǵa deıin jetkizýdi mindet etip qoıdy. Qazir siz 50 paıyzy qamtamasyz etilgen dep aıtyp otyrsyz. Biz kásipkerlermen kezdesýlerde osy máselege basa nazar aýdaryp kelemiz. Sol kezde olar keıbir jetkizýshiler ónimdi basqa elderden jetkizip, oǵan «Qazaqstanda jasalǵan» logotıpin japsyryp qoıatynyn aıtady. Osylaısha, olar tenderlerge qatysyp, dempıng pen tómen baǵa esebinen utyp alý múmkindigine ıe. Eger osy zańdy depýtattar qoldasa jáne oǵan Memleket basshysy qol qoısa, monıtorıng júrgizetin júıeniń qurylýyna yqpal etedi dep úmittenemiz. Sondaı-aq memlekettik organdar óz ónimderin óndiretin, jumys oryndarymen qamtamasyz etetin, salyq tóleıtin naqty otandyq óndirýshilerdi qoldaıdy dep senemiz», dedi Senat Tóraǵasy.
Palata Spıkeri zańnamalyq túzetýlerdiń mańyzyna nazar aýdaryp, Memleket basshysy Joldaýda satyp alýdyń jańa sapaly júıesin engizýdi tapsyrǵanyn tilge tıek etti.
Eske salaıyq, búgin ótken Palata otyrysynda senatorlar birqatar zańdy qarady. Onyń ishinde «Memlekettik satyp alý týraly» zań jáne oǵan ilespe zańdar da bar.
