Foto: Senat
Depýtattyń aqparaty boıynsha, elimizde qarttar men múgedekterge arnalǵan 118 áleýmettik ortalyq jumys isteıdi, fýnksııalardyń mańyzdylyǵyna qaramastan, qyzmetkerlerdiń jalaqysy tómen bolyp otyr. Mysaly, elordalyq ortalyqta 10 jyldan astam eńbek ótili bar áleýmettik qyzmetker aıyna 155 myń teńge, al tazalaýshy 87 myń teńge alady. Arnaýly áleýmettik qyzmetterge muqtaj balalardy qoldaý ortalyǵynda jaǵdaı uqsas, tazalaýshynyń jalaqysy 90 myń teńgeni, tárbıeshiniń jalaqysy 120 myń teńgeni, al tárbıeshi kómekshisiniń jalaqysy 80-100 myń teńgeni quraıdy.
«Múgedektigi bar, ártúrli dıagnozdaǵy tastandy balalarǵa qamqorlyq jasap otyrǵan mekeme qyzmetkerleriniń jumysy óte beınetti, ári jaýapkershiligi mol jumys. Olardyń eńbekaqy máselesi kúrdelenip tur. Áleýmettik qyzmet kórsetý ortalyqtaryndaǵy qyzmetkerlerdiń barlyǵynda arnaıy statýs bar dep aıta almaımyz. Buǵan qosa qyzmettik erekshelikke saı mamandarǵa júkteletin qosymsha aýyr jumystar, atap aıtqanda, naýqas balalardyń kútimine fızıkalyq eńbektiń kóbirek jumsalatyndyǵy, keıbir psıhıkalyq dimkástigi bar balalardyń tárbıeshilerge kúsh kórsetetindigi, soqqyǵa deıin jetetin jaǵdaılarda qyzmetkerlerdiń qorǵalmaýy da kópshilik bile bermeıtin másele. Áleýmettik qyzmet kórsetý ortalyqtaryndaǵy jalaqynyń tómendiginen jáne áleýmettik qorǵalmaǵandyqtan, ortalyqtarǵa kásibı bilikti mamandardy jumysqa tartý múmkindigi de joq», dep atap ótti senator.
