Foto: Senat
Jobanyń maqsaty - Parlament depýtattarynyń, barlyq deńgeıdegi máslıhattardyń, memlekettik organdardyń jáne Qazaqstan halqy Assambleıasynyń ózara turaqty is-qımyl júıesin uıymdastyrý. Senator Zakırjan Kýzıev Ulttyq quryltaı otyrysynda Memleket basshysy jańa qoǵamdyq etıkany ornyqtyrýda ortalyq organdar ǵana emes, sonymen qatar óńirlik bılik róliniń mańyzdylyǵyn da atap ótkenin eske saldy. Qoǵamda óskeleń ómirdi baǵdar etetin jáne dúnıetanymnyń ajyramas bóligine aınalatyn ustanymnyń keńinen qanat jaıýy úshin tıimdi tetikter izdeý men usyný jáne ilgeriletýde ortalyq pen óńirler tyǵyz baılanysta jumys isteýi kerek.
«Jobany iske asyrý barysynda halyqtyń ózekti máseleleri aıqyndalatyn bolady, ol Parlament, máslıhattar depýtattarynyń jumysynda jáne olardyń ózara is-qımylynda kórinis tabady. Biz óz jumysymyzda Assambleıanyń jáne ókildi bıliktiń ózekti máseleleri men mindetteriniń barlyq salasyn qamtıtyn bolamyz, sondaı-aq Parlament pen barlyq deńgeıdegi máslıhat depýtattarynyń QHA ókilderi men etnomádenı birlestikter basshylarynyń qatysýymen jergilikti jerdegi etnosaralyq qatynastar máselesin turaqty qaraýdy qamtamasyz etemiz. Bizdiń jumysymyzdyń basty baǵyty árqashan etnoáleýmettik shıelenistiń yqtımal oshaqtaryn anyqtaý jáne aldyn alý bolýy tıis», dedi Zakırjan Kýzıev.
Senator Olga Býlavkına Qazaqstanda 100-den astam etnos bar ekenin atap ótti, bul bizdiń elimizdi beıbit qatar ómir súrý men ózara syılastyq demokratııalyq quqyqtyq azamattyq qoǵam qurýǵa negiz bolǵan álemdegi eń kóp ultty elderdiń birine aınaldyrady. «Assambleıa. Parlament. Máslıhattar» jobasynyń aýqymyndaǵy syndarly dıalog zańmen bekitile otyryp, qoǵamdyq, konfessııaaralyq jáne etnosaralyq kelisimdi saqtaýdyń negizgi quraldarynyń birine aınalady. Sondaı-aq pisip-jetilgen áleýmettik ózgeristerdi ýaqtyly jáne qolaıly sheshýge, laıyqty ómir súrý jaǵdaıyn jasaýǵa yqpal etetin bolady.
Shyǵys Qazaqstan oblysy máslıhatynyń tóraǵasy Denıs Rypakov óz kezeginde óńirler máslıhattarynyń jáne QHA qurylymdarynyń jumysy týraly aıtyp berdi. Máselen, máslıhat tóraǵalary men depýtattar keńesterdiń otyrystaryna, óńirlik sessııalarǵa qatysady jáne etnomádenı birlestikterdiń ókilderimen kezdesedi. Jobany iske asyrý bul jumysty barlyq óńirlerde júıeleýge, mekemearalyq jumys josparlary men jol kartalaryn ázirleýge múmkindik beredi.
