Akademııa baspasóz qyzmetiniń málimetinshe, 2023-2024 oqý jylynda doktorantýra jáne magıstratýra bilim baǵdarlamalary boıynsha 124 túlek dıplomyn sátti qorǵady. 30 jylda Akademııa 2814 magıstr, 122 doktorantty daıarlap shyǵardy. Saltanatty sharanyń ashylýynda Memlekettik qyzmet isteri agenttiginiń tóraǵasy Darhan Jazyqbaı túlekterge sáttilik tiledi.
«Qazirgi ýaqytta memlekettik qyzmet salasynda Ádiletti Qazaqstan qaǵıdattaryna saı keletin júıeli reformalar júzege asyrylýda. Ashyqtyq, ádildik jáne merıtokratııa qaǵıdattary negizinde memlekettik qyzmetke qabiletti ári bilikti azamattardy, daryndy jastardy tartýǵa keńinen jol ashylýda. Memlekettik basqarý akademııasyn úzdik aıaqtaǵan túlekterdiń óńirlik deńgeıde konkýrssyz negizde basshylyq laýazymdarǵa taǵaıyndala alý múmkindigi de osynyń dáleli. Akademııadan túlep ushqan magıstranttar men doktoranttar memlekettik qyzmetshiler býynynyń naǵyz kóshbasshylary bolýǵa tıis. Alǵan kásibı quzyrettilikterińiz memleketimizdiń keshendi strategııalyq mindetterin sheshýde, basqarýdyń servıstik modeline kóshýde sheshýshi ról atqarady dep senemin», dedi MQIA tóraǵasy.
Dástúr boıynsha Akademııa rektory Erlan Ábil de túlekterdi quttyqtap, jyly lebizin bildirdi.
«Bizdiń túlekter – «Adal azamat» uǵymynyń qundylyqtaryn boıyna sińire otyryp, bolashaqqa baǵdarlanǵan memlekettik basqarý júıesiniń básekege qabiletti adamı kapıtalyna aınalýy tıis.
Bul rette, ózgermeli zaman talaptaryna sáıkes bilimdi, kásibı quzyrettiligi joǵary mamandardy daıarlaý maqsatynda Akademııa óz tarapynan aýqymdy jumystar júrgizip jatyr. Akademııa qabyrǵasynda alǵan bilimderińizben elimizdiń órkendep, damýyna eleýli úles qosyp, memlekettik basqarý salasynyń bilikti mamany bolatyndaryńyzǵa, Akademııa túlegi mártebesin bıik ustaıtyndaryńyzǵa senimimiz mol», dedi Erlan Qýanyshuly.
Sonymen qatar rektor shara barysynda «Prezıdenttik Akademııa túlekteriniń alıansy» qoǵamdyq birlestigi qurylǵany týraly málimdedi. Jańadan qurylǵan Alıanstyń Prezıdenti bolyp Memlekettik basqarý akademııasynyń túlegi, elordalyq kásipkerler palatasynyń basshysy Qanat Alın taǵaıyndaldy.
«Alıansty qurýdaǵy maqsatymyz — Akademııanyń ár jyldardaǵy túlekteriniń korporatıvtik rýhyn nyǵaıtý jáne barlyǵyn biriktirý. Árqaısymyzdyń jeke jáne kásibı ósýimizge yqpal etetin myqty uıym qura alamyz degen senimdemin. Árbir túlek alıanstyń jáne jalpy qoǵam ómirine belsendi qatysýy úshin jaǵdaı jasaımyz. Akademııa túlekteri óz bilimderimen, ıdeıalarymen jáne tájirıbelerimen bólise alatyn platformalar men is-sharalardy uıymdastyramyz. Árqaısysyńyzdy jetistikke toly bolashaqty birge qurýǵa, Prezıdenttik Akademııa túlekteri alıansynyń múshesi bolýǵa shaqyramyn», dedi Qanat Tóleýbekuly.
Akademııada Adamı resýrstardy basqarý mamandyǵy boıynsha magıstratýrany támamdaǵan Aınagúl Qaqıeva Atyraýǵa oralyp, memlekettik qyzmettegi eńbegin jalǵastyrmaq.
«Búgin biz úshin qýanyshty kún. Magıstrlik jobany sátti qorǵap, dıplom alyp jatyrmyz. Akademııaǵa bilim alýshylarǵa bergen zor múmkindigi úshin alǵys aıtamyz. Biz munda bilim alyp qana qoımaı, kásibı biliktiligimizdi arttyrdyq, sonymen qatar sheteldik taǵylymdamaǵa barýǵa múmkindik aldyq. Memlekettik basqarý akademııasynyń 30 jyldyq mereıtoıy qutty bolsyn», dedi túlek.
Saltanatty is-sharaǵa Memlekettik qyzmet isteri agenttigi tóraǵasy Darhan Jazyqbaı, Túrkııa Prezıdenti janyndaǵy Adam resýrstary ofısiniń prezıdenti Doktor Salım Ataı jáne Adam resýrstary ofısi bóliminiń basshysy Savash Djeılan, Prezıdent Ákimshiliginiń Memlekettik qyzmet bóliminiń meńgerýshisi Rýslan Turǵanaly, Astana memlekettik qyzmet haby Basqarýshy komıtetiniń tóraǵasy Álıhan Baımenov, Qarjy mınıstrliginiń apparat basshysy Erǵalı Egemberdi, Birikken Ulttar Uıymy Damý baǵdarlamasynyń memlekettik mekemeler úshin genderlik teńdikke qol jetkizý boıynsha sertıfıkattaý baǵdarlamasynyń jahandyq menedjeri Ana Landa Ýgarte, Birikken Ulttar Uıymy Damý baǵdarlamasynyń Qazaqstandaǵy turaqty ókili Katarjına Vavernıa, Ázerbaıjan Respýblıkasy Prezıdentiniń janyndaǵy Memlekettik basqarý akademııasynyń rektory Ýrhan Kazym oglý Alekperov, Fýdan ýnıversıtetiniń professory (Qytaı) Zhang Ping qatysty.
Atap óteıik, Prezıdent janyndaǵy Memlekettik basqarý akademııasyna 2024-2025 oqý jylyna magıstratýraǵa jáne doktorantýraǵa oqýǵa qujat qabyldaý osy jyldyń 26 maýsymyna deıin júrgiziledi. Jańa oqý jylyna memleketten 132 grant (magıstratýraǵa – 120, doktorantýraǵa – 12) bólindi.
